Kryemadhi: Nuk është koha për dekorata, por për dialog
Kryetarja e Lëvizjes Socialiste për Integrim, Monika Kryemadhi, i konsideron 9 kushtet e Bundestagut gjerman si semafor i kuq për Kryeministrin Edi Rama. Nëpërmjet një postimi në "Facebook", dje ajo argumentoi se vendimi pro ishte për të mbështetur popullin shqiptar që është pro europian. "Nëntë kushtet e vendosura nga Bundestagu për hapjen e negociatave janë një semafor i kuq për Edi Ramën, pasi flasin qartë për kapjen e Sistemit të Drejtësisë, për krizën kushtetuese dhe institucionale, pa ndëshkueshmërinë e blerjes së votës dhe intimidimin e votuesve, si dhe paligjshmërinë e procesit të votimeve të 30 qershorit, ku Edi Rama vendosi ta kthejë Shqipërinë në një sistem monopartiak, duke synuar zhdukjen e pluralizmit politik", shkroi dje Kryemadhi. Teksa ironizoi veprimin e një viti më parë të Kryeministrit Edi Rama, që dekoroi disa ambasadorë të huaj në Shqipëri, për kontributin e dhënë për çeljen e negociatave, Kryemadhi apeloi për reflektim dhe dialog. "Sot nuk është momenti i dekoratave, si ato të 2018- ës, as për shampanjë apo euforizëm politik. Tani është koha ku gjithsecili nga ne duhet të marrë përgjegjësi përballë sfidave reale të vendit dhe përballë qytetarëve. Nëse duam vërtet që negociatat të çelen vitin që vjen, atëherë duhet të ndalim një herë e mirë propagandën politike dhe t'i japim qytetarëve shansin për një Shqipëri europiane. Jo dialog për interesa individësh, por dialog transparent për qytetarët, gjithëpërfshirës e të sinqertë", përfundoi kryetarja e LSI- së.