Meta: Ndal shpopullimit të Shqipërisë!
“Kjo është sfida më e madhe që kërkon reflektim urgjent”
Presidenti i Shqipërisë, Ilir Meta, bën thirrje që të frenohet largimi i shqiptarëve nga Shqipëria. Referuar anketë së fondacionit gjerman “Friedrich Ebert”, për edukimin e të rinjve në Europën Juglindore, sipas të cilit 285 mijë të rinj planifikojnë të ikin nga Shqipëria, kreu i shtetit kërkoi një reflektim urgjent.” Ndalimi i shpopullimit të Shqipërisë, sfida më e madhe që kërkon reflektim urgjent!”, shkruan Presidenti. Sipas një ankete të fondacionit gjerman “Friedrich Ebert” për edukimin e të rinjve në Europën Juglindore, që u publikua këto ditë, 285 mijë shqiptarë planifikojnë të ikin nga vendi në vitet në vijim, shumica e të cilëve janë të rinj. 26% pohuan se dëshirojnë të emigrojnë në Gjermani, 18% në Britani, 16% në Itali dhe pjesa tjetër në vende të tjera. Si numër, shqiptarët janë të dytët që duan të ikin, pas rumunëve ( 358 mijë), por në raport me totalin e të rinjve që duan të emigrojnë, thyejmë rekord, me 40% të të rinjve që duan të largohen nga vendi ( shih grafikun). Studimi për edukimin e të rinjve vë në dukje se vala e emigracionit te të rinjtë ka nisur rënien në shumë vende të Europës Juglindore, por ai mbetet i lartë në Rajonin e Ballkanit dhe sidomos në Shqipëri. Faktorët ekonomikë dhe perceptimi negativ i situatës në vendin e lindjes janë faktorët më të fortë motivues për emigracionin e të rinjve. Por ndërkohë, emigrimi i trurit ndryshon ndjeshëm nga vendi në vend. Fenomeni është shumë agresiv në Shqipëri dhe Malin e Zi, ndërsa në Bullgari dhe Maqedoni, të rinjtë e shkolluar kanë më pak prirje të emigrojnë. Të rinjtë nga rajoni EJL shfaqin një nivel të lartë të gatishmërisë për t’u integruar në strukturën e shoqërive ku emigrojnë dhe kjo demonstrohet nga gatishmëria e tyre për të mësuar gjuhën e vendit pritës. Anketa nxjerr në pah se prirje për të emigruar kanë më së shumti të rinjtë që nuk janë të punësuar. Të rinjtë që nuk janë në punë, planifikojnë të ikin në një periudhë të afërt prej gjashtë muajsh. Ata me prindër me nivel të ulët arsimor dhe ekonomik janë më shumë të prirë të largohen, gjithashtu edhe ata që banojnë në zonat rurale e kanë më tepër këtë tendencë.