Presidenca hap garën për Gjykatën Kushtetuese
Pas kërkesës së Këshillit të Emërimeve në Drejtësi, Presidenti rihapi dje garën për plotësimin e vendit vakant gjyqtar në Gjykatën Kushtetuese. Në faqen zyrtare të Presidencës njoftohet rishpallja e procedurës së aplikimit, me qëllim plotësimin e "Vakancës së parakohshme", të krijuar për shkak të përfundimit përpara kohe të mandatit të ish- gjyqtarit, Besnik Imeraj. Më herët, KED ka informuar Presidentin se nga 15 kandidatë që kanë shprehur interesin për konkurrim, kanë ngelur në garë vetëm dy kandidatë të lejuar për kandidim, pra më pak se numri i domosdoshëm 3. Konkretisht, për plotësimin e vendit vakant të lënë nga Imeraj, në garë janë prokurori Besnik Muçi dhe gjyqtarja Regleta Panajoti. Këshilli i Emërimeve në Drejtësi ka përfunduar procesin e përzgjedhjes për 6 kandidatët, që janë në garë për plotësimin e 4 vendeve vakante në Gjykatën Kushtetuese, duke bërë pikëzimin e tyre, ndërsa lista nuk është dërguar ende për votim.