Taulant Balla: Të gjithë duhet të marrim përgjegjësitë

Një ditë pas vendimit të Bundestagut gjerman për të mandatar Kancelaren gjermane, Angela Merkel, për të votuar pro Shqipërisë, por nëse plotësohen 9 kushtet, Sekretari i Përgjithshëm i PS- së, Taulant Balla, bën thirrje që të marrë përgjegjësitë e duhura çdo forcë politike. Gjatë një deklarate në Elbasan, Balla theksoi se për hapat që hedh Shqipëria, nuk është përgjegjëse vetëm qeveria. "Ata që u përbetuan se Gjermania do të votojë kundër hapjes së negociatave, sot të hapin sytë dhe veshët dhe ta shohin këtë si një moment të rëndësishëm për të çuar përpara të gjithë së bashku angazhimet që kemi. Në një vend demokratik, të gjithë kanë përgjegjësitë e tyre. Kemi ne përgjegjësi, që sot jemi në qeveri, por kanë përgjegjësi edhe ata që në mënyrë të pashpjegueshme, jo vetëm që ikën nga Parlamenti, por që i vunë edhe flakën Kuvendit, por sot jemi në një ditë të gëzueshme. Unë jam shpresëplotë që të 28 vendet anëtare do t'i japin dritë jeshile fillimit të procesit të bisedimeve", tha Balla. 9 pikat e vendosura nga Bundestagu gjerman në rezolutë, Balla këmbëngul se nuk janë kushte, por detyra shtëpie. Balla ishte në Gjermani gjatë kohës që Bundestagu diskutonte rezolutën për Shqipërinë dhe Maqedoninë e Veriut. Nga kontaktet që ai pati, Balla tha se Reforma në Drejtësi është guri i themelit për këtë vendim. "Reforma në Drejtësi ishte guri i themelit të suksesit që Shqipëria po merr në rrugën europiane dhe nëse ju i quani kushte, unë nuk i quaj të tilla. Për mua janë detyra të shtëpisë, të cilat janë në vijim. Plotësimi i vendeve vakante në Gjykatën Kushtetuese apo në Gjykatën e Lartë janë detyrat e shtëpisë, të cilat janë duke u kryer. Kujtoj këtu që Kuvendi do të përmbushë 3 vendet e anëtarëve në Gjykatën Kushtetuese, po kështu edhe Presidenti i Republikës. Këshilli i Emërimeve në Drejtësi ka bërë një punë të shkëlqyer në kohë, ndërsa Këshilli i Lartë i Gjyqësorit është në proces të përfundimit të vlerësimit të kandidaturave që lidhen me vendet e para vakante në Gjykatën e Lartë", tha Balla. Ndërkohë, sipas numrit dy të PS- së, duhet pritur vendimi përfundimtar në 17- 18 tetor. "Vendimi i Gjermanisë për të votuar pro hapjes së negociatave për Shqipërinë, është një moment i rëndësishëm historik, teksa duket tashmë që në mes të tetorit merr formën përfundimtare, pasi këshilli i përgjithshëm i çështjeve në kuadër të Komisionit Europian, më pas vetë Këshilli, në datë 17- 1,8 do t'i japi formën përfundimtare këtij vendimi të rëndësishëm të Bundestagut", përfundoi Balla nga Elbasani.