Basha: Përgatitje për zgjedhje të parakohshme lokale e parlamentare
"Shkojmë për zgjedhje lokale dhe parlamentare, të ngrihen shtabe qendrore elektorale dhe politike"
Në takimin e mbrëmjes së shtunë me krerët e degëve lokale të Partisë Demokratike, Lulzim Basha ka folur për zgjedhje të parakohshme parlamentare dhe lokale njëkohësisht.
Në kuadër të përgatitjes së partisë për vijim e aksionit opozitar për muajt në vazhdim, Kryedemokrati mësohet t'u ketë thënë krerëve lokalë se opozita e ka gati platformën për të dalë nga kriza. Ky plan, sipas Lulzim Bashës, nënkupton kalimin përmes zgjedhjeve të parakohshme parlamentare dhe lokale tënjëkohshme, që duhet të organizohen nga njëqeveri tranzitore, e cila duhet të ketë për detyrë garantimin e standardeve demokratike. "Vendi është në një krizë të thellë shumëplanëshe dhe detyra e PD- së dhe opozitës është të angazhohet seriozisht për të qenë pranë njerëzve dhe për t'i hapur rrugë perspektivës europiane të Shqipërisë. Opozita ka dhënë propozimet e veta për zgjidhjen e krizës në vend, që kalon përmes zgjedhjeve të njëkohshme parlamentare dhe lokale të parakohshme, me qeveri tranzitore, që garantojnë standardet për zgjedhjet e lira dhe të ndershme", është shprehur kreu i PD- së. Më tej, në fjalën e tij, Basha ka kërkuar që të rritet niveli i organizimit në bazë dhe se strukturat duhet të punojnë sikur zgjedhjet të ishin nesër. Ai u ka bërë apel kryetarëve lokalë për ta hapur partinë për njerëz të aftë dhe me integritet të lartë profesional. "Duhet riorganizim, në të njëjtat kushte sikur të ishim në zgjedhje. Të bashkohen faktorë dhe aktorë mepotencial njerëzor e elektoral pranë PD- së, si dhe hapja e partisë për njerëz me integritet profesional e moral", iu ka thënë Basha të tijve mbrëmjen e së shtunës. Lideri demokrat në këtë takim ka shpalosur edhe një strategji të re të Partisë Demokratike që ka të bëjë me ngritjen e një shtabi qendror elektoral dhe politik, që më pas do të zgjerohet në të gjithë vendin." Pranë Partisë Demokratike do të ngrihet shtabi qendror elektoral dhe politik, shtabe që do të shtrihen në mënyrë piramidale në të gjithë vendin. Puna do të përqendrohet në planin e ofrimit të zgjidhjes për qytetarët, denoncimeve për aferat korruptive dhe kriminale të qeverisë", ka thënë Basha. Gjatë këtij takimi me kryetarët e PD- së në rrethe, Basha u ka paraqitur atyre edhe një kalendar të qartë e konkret pune, me përgjegjësitë dhe afatet e qarta për gjithsecilin. Sa i përket aksionit politik, u vendos që format dhe mënyra do të përcaktohet në një moment të dytë, se si do të procedohet me protestat apo me qëndrimet në lidhje me çështje të caktuara. Pas këtij takimi, Basha pritet të mbledhë edhe ish- grupin parlamentar dhe kryesinë e Partisë.