ARDI VELIU: ARRESTUAN DY PERSONA SI PRITËS, NJË TJETËR NË KËRKIM
Policia e Shtetit, në bashkëpunim me autoritetet ligjzbatuese greke, në koordinim me Zyrën e DEA- s në Athinë, nën drejtimin e Prokurorisë së Krimeve të Rënda, finalizoi me sukses operacionin ndërkombëtar "KUITO". Drejtori i Përgjithshëm i Policisë, Ardi Veli, të premten, gjatë një konference për shtyp, tha se në kuadër të luftës për parandalimin, evidentimin dhe goditjen e trafikut të lëndëve narkotike dhe operacioneve të njëpasnjëshme të zhvilluara me partnerët, Policia e Shtetit ka finalizuar një tjetër operacion ndërkombëtar për këtë qëllim, duke sekuestruar 137 kg kokainë. Policia shqiptare organizoi dorëzimin e kontrolluar pas miratimit dhe lejimit nga autoritetet greke, procedura të cilat filluan nga pala shqiptare që në muajin gusht 2019 dhe përfunduan më 27 shtator. Gjatë kësaj periudhe, u realizuan disa takime operacionale nga Policia e Shtetit me autoritetet policore greke dhe Zyrën e DEA- s. Këto takime u realizuan në Tiranë dhe në Athinë për shkëmbimin e informacioneve dhe mbarëvajtjen e operacionit që do të zhvillohej për goditjen e aktivitetit kriminal të personave që trafikonin lëndë narkotike të llojit kokainë nga Ekuadori në Greqi dhe më pas në Shqipëri, nëpërmjet rrugës detare. "Në realizimin e këtij operacioni, për dorëzimin e kontrolluar janë zbatuar të gjitha teknikat speciale të hetimit të miratuara me ligjin nr. 8920., datë 11.07.2002, për Ratifikimin e Konventës së Kombeve të Bashkuara kundër Krimit të Organizuar ndërkombëtar dhe dy protokolleve shtesë të saj", tha dje gjatë konferencës drejtori i përgjithshëm i Policisë, Ardi Veliu.
Rruga që kanë ndjekur kontenierët me 137 kg kokainë nga Ekuadori deri në Portin e Pireut, është kontrolluar vazhdimisht nga porositësit e drogës, pasi brenda pakove ishte vendosur pajisje GPS mjaft e sofistikuar, që në nisje.
Më tej, rruga deri në Portin e Durrësit e deri sa ra në gjurmët e dy prej pritësve që u arrestuan, është vëzhguar edhe nga Policia, por njëkohësisht edhe nga trafikantët. Në momentin që oficerët e Policisë kanë vendosur që të bëjnë zëvendësimin e pakove të kokainës me oriz dhe gips, kanë parë që brenda tyre kishte edhe GPS. Megjithatë nuk e kanë hequr transmetuesin, pasi gjithçka do të kuptohej nga personat që fshiheshin pas kësaj ngarkese. Por, përveç trensmetuesit të tyre, efektivët e Policisë kanë vendosur edhe vetë GPS, për të qenë në të njëjtën linjë. Burime nga grupi hetimor thanë se pakot e izoluara edhe me pjesë gome, ishin ndarë në 4 kontenierë frigoriferikë që transportonin banane. Gjatë ndërhyrjes në Portin e Pireut, në Greqi, ku kishin shkuar edhe oficerë shqiptarë kundër Krimit të Organizuar, është vendosur që të vihej në zbatim metoda speciale e dorëzimit të kontrolluar. Në këtë formë, është vendosur që kontenierët të lejoheshin të mbërrinin në destinacion dhe përveç GPS- së së trafikantëve, janë shtuar edhe GPS- të e Policisë. Më parë, grupi i oficerëve, në përbërje të të cilit kishte shqiptarë dhe grekë, bënë peshimin e drogës që rezultoi të ishte 137 kg.
DOREZIMI I KONTROLLUAR Pasi kontenierët u nisën me anije nga Porti i Pireut në drejtim të Portit të Durrësit, nisi edhe operacioni për dorëzimin e kontrolluar të ngarkesës me drogë. Nga hetimet e kryera, vëzhgimi në terren, por dhe verifikimi i kamerave të sigurisë, rezulton se në Portin e Durrësit ka hyrë fillimisht një automjet me targa franceze. Pasi kjo makinë futet në Port, shfaqet në pamjet e kamerave edhe Gentian Malindi, i cili përdor një kartë për të hyrë në terminal, duke kryer çekinin. Më pas, Malindi i afrohet makinës dhe qëndron aty për pak kohë. Nga ana tjetër, i arrestuari Ardian Bega, punonjës i sigurisë së Portit, sipas grupit hetimor ka shpërqendruar një nga rojet që ishte në shërbim, duke i ofruar pije alkoolike. Peshkatari, Altin Myslihaka, i punësuar nga i kërkuari Gentian Malindi, ka lëvizur në drejtim të kontenierit, ku është filmuar duke futur disa pako me drogë në një çantë. I arrestuari Ardian Bega ka treguar se në momentin që kanë hipur në makinën e blerë në Roskovec në muajin gusht, Gentian Malindi i ka kërkuar punëtorit të tij, shtetasit Altin Myslihaka, që ta prekte njërën nga pakot nëse shtypej apo jo. Më pas, i ka kërkuar që ta çajë dhe në këtë moment ka parë që në pako nuk kishte kokainë, por oriz. Sapo ka kuptuar rrengun, Gentian Malindi u ka kërkuar dy personave të tjerë që të mos flisnin, duke u thënë: "Na kanë vendosur çip.". Pikërisht në këtë moment, pakot janë hedhur në rrugë, afër Shkëmbit të Kavajës, para një hoteli.
HETIMET Gjatë hetimeve të deritanishme rezulton se dy shtetasit e arrestuar dhe personi i shpallur në kërkim ishin pritësit e kësaj lënde narkotike në Durrës. Drejtori i Përgjithshëm i Policisë, Ardi Veliu, tha se këta persona, në bashkëpunim me njëri- tjetrin dhe persona të tjerë në Portin e Durrësit, duke shfrytëzuar faktin që kishin akses në hyrjen dhe daljen në Port, bënë të mundur nxjerrjen e një sasie të lëndës narkotike nga kontenieri. Më pas, bënë dërgimin e saj në një zonë të sigurt që ata mendonin, por që është sekuestruar nga Policia gjatë operacionit. Të gjitha veprimet e kryera nga shtetasit e mësipërm ishin të mbikëqyrura nga strukturat e Policisë së Shtetit, të cilët bënë të mundur sekuestrimin e të gjithë lëndës narkotike, arrestimin e dy shtetasve dhe shpalljen në kërkim të një tjetri, për veprat penale "Trafiku ndërkombëtar i lëndëve narkotike, e kryer në formën e grupit të strukturuar kriminal".