Tërmetet, vijon rivlerësimi i banesave në Tiranë
Ndërtesat në Ndroq, Pezë dhe Baldushk më problematike
Ndonëse ka kaluar një javë nga vala e tërmeteve të mëdha që shkundën Shqipërinë e mesme, nuk ka përfunduar ende procesi i rivlerësimit të banesave nga ana e bashkisë. Kjo, për shkak të numrit të madh të objekteve. Deri më tani janë inspektuar 3 mijë të tilla dhe numri pritet të rritet në vazhdim. "Aktualisht jemi në fazën e marrjes së informacionit, duke përditësuar edhe ankesat. Ndërkohë po fillohet gradualisht me disa subjekte që kanë qenë në gjendje vërtet kritike, pasi paqëndrueshmëria e tyre mund të sillte një rrezikshmëri të lartë. "Jemi aktiv për t'i ardhur në ndihmë banorëve të Tiranës dhe rrethinave të saj", shprehet stafi i emergjencave civile në bashki. Sakaq, edhe pse verifikimi është në proces, ka nisur rikonstruksioni i disa banesave, proces që e kanë marrë përsipër disa kompani ndërtimi. Kryebashkiaku Erion Veliaj siguron familjet e prekura se do të dëmshpërblehen, teksa u bën thirrje donatorëve të vënë dorë edhe në Kombinat. "Shumica e banesave të prekura janë shtëpi të ndërtuara në mënyrë primitive. Doja shumë që të vazhdojmë edhe me adoptimin e hapësirave që kemi identifikuar këtu në Kombinat apo zonat përreth. Pra, për të gjithë donatorët që duan të adoptojnë një shtëpi, të sigurohemi që t'i bëjmë në kohë rekord, brenda vitit të ri. Qoftë për banesat më të dëmtuara, qoftë me disbursimin e parave për banesat më pak të dëmtuara", deklaroi Veliaj, duke theksuar se puna për rindërtimin e banesave të prekura nga tërmeti e më pas nga përmbytjet do të shtrihet në çdo cep të Tiranës. Sipas të dhënave, dëmet më të mëdha janë vënë re në rrethinat e kryeqytetit. Më problematike paraqitet situata në Ndroq, Pezë dhe Baldushk.