Teuta dhe Bylis në krye, Flamurtari si autoshkollë
Shkëlqen Vllaznia, Skënderbeu shkërmoqet në Shkodër me katër gola
Teuta kthehet te fitorja dhe merr kreun. Përballë Kukësit i ka mjaftuar një gol me penallti nga Sherif Kallaku.
Në "Niko Dovana" u zhvillua një duel më shumë se i luftuar, ku veç 11- metërshit të diskutuar që "vulosi" ndeshjen, skuadrat u detyruan që ta mbyllnin me nga 10 lojtarë pas kartonëve të kuq. Verilindorët vuajtën pa fund dhe sidomos në metrat e fundit. Përtej dëshirës së Shkurtajt, Gavazajt apo Abazajt, e patën të pamundur që minimalisht të barazonin shifrat. Pas kësaj humbjeje, të besuarit e Shpëtim Duros lëshojnë edhe vendin e parë.
VLLAZNIASKËNDERBEU 4- 0
Vllaznia ka mposhtur me rezultatin 4- 0 Skënderbeun, në sfidën e vlefshme për javën e 6- të të Kategorisë Superiore. Dopieta e Gilman Ligës dhe golat e Zogajt dhe Hygorit, i siguruan një fitore mjaft me vlera skuadrës së Jonuz! Një përballje që u dominua në pjesën më të madhe të lojës nga kuqeblutë, ndaj një Skënderbeu thuajse in- ekzistentë në fushë! Sfidën e radhës Vllaznia do ta luajë në transfertë ndaj Kukësit, ndërkohë që Skënderbeu do të presë Luftëtarin.
LUFTËTARI- LAÇI 1- 1
Luftëtari dhe Laçi nuk kanë shkuar më shumë se barazimi 1- 1 në një ndeshje dramatike në Gjirokastër. Pas një pjese të parë shumë të mirë të bluzinjve, të cilët kaluan në avantazh falë golit të kapitenit Donald Rapo, më pas ishin kurbinasit që dominuan në 45 minutat e dyta, por që barazimin e gjetën vetëm në kohën shtesë. Duhej të vinte minuta e 94- t, që takimi të merrte një rrjedhë të papritur, pasi gjyqtari Olsi Ferati akordoi 11- metërsh në favor të Laçit dhe gjirokastritët nuk u pajtuan më këtë vendim.
BYLIS- FLAMURTARI 5- 0
Ekipi i ardhur nga Kategoria e Parë është sot në krye të tabelës së klasifikimit, edhe pse provizorisht. Me pikë të barabarta me Teutën, skuadra e drejtuar nga Dovedan e gjen veten në shkallën e sipërme. E për ta arritur këtë, shënon pesë herë ndaj një legjende, një klubi që ka bërë historinë në futbollin shqiptar, por që në fushën e lojës shndërrohet në një grup lojtarësh, të cilët vetëm shëtisin fanellën. Ballshiotët e vendosin takimin me 3 gola, nga minuta 30- 40. Më tej, edhe dy në fraksionin e dytë dhe si finale, fitore e merituar dhe një "shuplakë" ndaj miqve. Ballshiotët në krye me pesë "yje", Flamurtari si autoshkollë mbetet në fund.