Matësit e rinj për ujin, pensionistët që s’paguajnë
Zbardhet vendimi i qeverisë për kategoritë që përfitojnë lidhje uji falas. Si t’i shmangen pensionistët detyrimit të ri. UKT nis aksionin
Ndërmarrja e Ujësjellës Kanalizimeve në Tiranë ka nisur prej dhjetë ditësh fushatën e ndërrimit të matësve të ujit.
Me anë të një letre adresuar në familjet, sahati i të cilave ka kaluar pesë vite funksionim, UKT- ja iu bën me dije se kostoja e montimit dhe sigurimit të pajisjes së re, që zëvendëson të vjetrën, pavarësisht faktit nëse punon apo jo, do të përballohet nga ata. Megjithatë, janë disa kategori familjesh, që i shmangen detyrimit për këtë ndërrim të detyruar të sahatit të ujit. Por si do të bëhet kjo? Këshilli i Ministrave ka vendosur që si për lidhjen e re të matësit, ashtu edhe për ndërrimin e tij periodik, të paguajë bashkia. Për shërbimin e fundit, kategoritë familjare përfituese ( në tabelë përbri shkrimit) subvencionohen nga pushteti vendor, pasi ky i fundit të ketë marrë dokumentacionin që vërteton kontratën e lidhur dhe matësit e vendosur.
VENDIMI
Përpara se të nisnin aksionet e herëpashershme në kryeqytet për ndërrimin e sahateve të ujit, qeveria ka vendosur të lehtësojë nga barra financiare për lidhjen dhe sahatin e ujit disa kategori familjarësh, duke i subvencionuar. Pensionistët kryefamiljarë, pa fëmijë në ngarkim, anëtarë familjeje të punësuar, dhe të banojnë në qytet, nuk do të paguajnë. Po ashtu, edhe familjet, në përbërje të së cilave ka anëtarë që përfitojnë pension invaliditeti apo janë me aftësi të kufizuara, përjashtohen nga pagesa për matësin e ri. Pjesë e kategorive përfituese janë edhe kryefamiljarët e papunë, që mezi përballojnë jetesën. Vendimi, që parashikon lehtësira për familjet shqiptare, ka hyrë tashmë në fuqi, por do të duhet që këto të fundit, së pari të jenë në dijeni dhe të ndjekin rrugën e duhur për të përfituar subvencionimin që u takon.
URDHRI
Çdo familjeje që ka mbi pesë vjet që ka ndërruar matësin e ujit po bëhet subjekt kontrolli nga privatët e kontraktuar nga bashkia për të kryer verifikimin dhe kolaudimin e matësve. Janë këta të fundit që do të japin verdiktin final nëse aparati aktual përputhet me kushtet ligjore teknike apo nëse nevojitet zëvendësimi i tij. Sipas letrës që qarkullon prej ditësh ( faksimile bashkëngjitur shkrimit) dhe po shkon në çdo shtëpi me sahat të vjetër, nënvizohet se vetëm procesi fillestar, verifikimi nga ekspertët e kompanisë private, që kanë fituar tenderin për të bërë kolaudimin e matësve, do të paguhet nga bashkia. Pjesa tjetër dhe më e rëndësishme, sigurimi dhe vendosja e matësit, vlera e të cilit nuk bëhet e ditur në dokument, do të paguhet nga konsumatori. E gjitha kjo ndodh në kulmin e pakënaqësive për furnizimin me ujë të konsumatorëve kryeqytetas. Sakaq, zëvendësimi i aparateve matëse me kriter të vetëm periudhën 5vjeçare të kolaudimit, cilësohet si korrupsioni i radhës midis Bashkisë së Tiranës dhe kompanisë që ka fituar tenderin. Ujësjellësi i njofton klientët se ata duhet të jenë të pranishëm gjatë kryerjes së kësaj procedure, për ta bërë sa më transparent këtë proces bashkë me përfaqësuesit e UKT sh. a dhe të subjektit të autorizuar nga Drejtoria e Përgjithshme e Metrologjisë për kolaudimin e ujëmatëseve. Në përfundim të verifikimit, aparati ujëmatës do të pajiset me vulë, e cila do të certifikojë përmbushjen e përcaktimeve ligjore dhe teknike për aparatin.