Basha: Jemi futur në fazën finale të zgjidhjes së krizës
Kreu i PD paralajmëron protesta pas vendimit për negociatat
Partia Demokratike nuk ka hequr dorë nga kushti për zgjedhje të parakohshme, që do të organizohen nga një qeveri tranzitore pa Kryeministër Edi Ramën.
Ky ka qenë mesazhi kryesor që kryedemokrati Lulzim Basha u dha dje anëtarëve të kryesisë dhe ish- deputetëve të PD- së, në mbledhjen e parë për këtë sezon politik. Burime nga brenda mbledhjes bën me dije për gazetën "Panorama" se kreu i opozitës e nisi mbledhjen duke u bërë të ditur atyre vijueshmërinë e aksionit opozitar. Fjala e Bashës u mbështet në tri shtylla kryesore. "Raporti i OSBE/ ODIHR dhe rezoluta e Bundestagut, duke shpresuar se deri në tetor nuk ka ndërhyrje negative nga vendet skeptike, është skanimi i situatës. Jemi futur në fazën finale të zgjidhjes së krizës. Zgjidhja e krizës, që mbetet imperativ dhe objektiv kryesor yni, vjen vetëm duke iu drejtuar sovranit me zgjedhje të lira e të ndershme. Asnjë iluzion se aksioni opozitar do të ketë ndërprerje apo tërheqje. Krahas aksionit opozitar dhe qytetar, do të vazhdojmë me përfundimin e programit dhe alternativës", tha Basha. Më tej, kryetari i selisë blu i kërkoi grupit që në 4 javët e ardhshme të jenë sa më pranë strukturave në rrethe dhe qytetarëve. Basha ka kërkuar kualitet te personat që do të afrohen në parti, si në nivel lokal, ashtu edhe në atë qendror. "Përgatitja e PD për zgjedhje të parakohshme parlamentare dhe zgjedhje vendore në 1 ditë. E gjithë partia, jo vetëm forumet, zbret në terren dhe nis përgatitjet dhe kontaktin me qytetarët për zgjedhjet si zgjidhja e krizës. Zgjidhja e krizës janë zgjedhjet e parakohshme. Aksioni opozitar do të intensifikohet, gati për protesta. Ritmi i punës në terren duhet të rritet. Alternativa është duke u përgatitur", tha Basha në fjalën e tij. Mbledhja e parë për këtë sezon politik e kryesisë dhe ishgrupit parlamentar e PD- së nuk ka patur asnjë vendimmarrje, por ka qenë koordinuese. Sa i përket protestave, ato janë lënë për t'u diskutuar pas vendimit që do të marrë Këshilli i Europës më 1718 tetor, për çeljen e negociatave. Kreu i selisë blu u ka kërkuar të tijve që të lobojnë tek ata që njohin, në mënyrë që vota e Holandës të jetë
pozitive. "Sot a ka media që po flasin që Holanda mund të dalë kundër. Ne duhet të përdorim të gjithë kapacitetin tonë për të lobuar, që të marrim një "po nga Holanda", u tha Basha të tijve. PD- ja ndërkohë ka gati platformën ekonomike për biznesin e vogël dhe platformën për fermerët.