Deputeti i opozitës së re: Të pyesim PD për Reformën
“Edhe ata e kanë kuptuar se dalja nga sistemi ishte gabim i madh”
Deputeti i Grupit Parlamentar Demokrat, Korab Lita, kërkoi dje kushtëzim të votave të deputetëve opozitarë për ligjet që kërkojnë shumicë të cilësuar. Gjatë fjalës së tij dje në Parlament, deputeti i opozitës së re tha se “Kjo qeveri nuk meriton asnjë votë tonën për të gjitha ligjet e thjeshta. Mënyra e gatimit të ligjeve, koncesionet korruptive, janë të tilla që nuk përfaqësojnë votën opozitare dhe asnjë prej tyre nuk meriton votën tonë duke filluar nga më e rëndësishmja, projektbuxheti i ardhshëm që pritet të vijë. Me votat e vjedhura të 2017- ës, qeveria miraton të gjitha ligjet që asaj i shërbejnë për vjedhjen e taksave të shqiptarëve. Ne s’kemi arsye të bëhemi pjesë e kësaj megavjedhjeje që po bën qeveria çdo ditë”. Për votimet e cilësuara, deputeti i opozitës u kërkon kolegëve të tij që të negociohet me maxhorancën dhe qeverinë. “Për të gjitha votimet që kërkojnë 84 vota dhe për të cilat vota jonë është e domosdoshme, ne duhet të negociojmë me maxhorancën ndryshime sistematike të ligjeve organike, që kërkojnë shumicë të cilësuar e të cilat sjellin vërtet një dobi për vendin dhe duhet të ulemi rast pas rasti për të koordinuar grupet parlamentare që të jemi të bindur që kur e japim këtë vote, ajo t’i shërbejë vendit”, u shpreh deputeti i opozitës së re. Por risia e propozimit të deputetit demokrat është bashkëpunimi që ai kërkon me Partinë Demokratike. “Për të gjithë elementët që kërkojnë 2/ 3 e votave, siç është Reforma Elektorale dhe Sistemi Elektoral, shoqëruar me ndryshimet Kushtetuese, unë mendoj se duhet të konsultohemi shumë më gjerë se kaq. Duhet të konsultohemi sepse është një përgjegjësi historike dhe ne nuk mund ta marrim atë përsipër me një votim të thjeshtë parlamentar, por duhet të konsultohemi me Qytetaret Shqiptare, me aktorët e tjerë politikë, pse jo dhe me Partitë nga ku kemi dalë ( pasi tashmë edhe ata e kane kuptuar që dalja nga sistemi ishte një gabim i madh), me faktorët shoqërorë, në mënyrë që vota jonë, decizive për të krijuar 2/ 3 e votave, të jetë e mirëmenduar dhe të jetë vërtet e dobishme për vendin”, u shpreh Lita. Sipas tij, “misioni i ri i imi dhe i kolegëve parlamentarë mendoj se është ky: Të përfaqësoj popullin opozitar, votat e të cilit kemi marrë dhe votat e të cilit përfaqësoj në këtë Parlament, për të bërë jo thjesht sa më të shkurtër jetën e kësaj qeverie, por për shumë më tepër se kaq”.