Draftrezoluta e Kuvendit: Të hapen negociatat, vendi kërkon dialog politik

Kur kanë mbetur më pak se 2 javë nga marrja e vendimit të Këshillit Europian për hapjen ose jo të procesit të negociatave për Shqipërinë, Kuvendi ka dalë me një projektrezolutë që kërkon angazhimin maksimal për arritjen e këtij objektivi. Dokumenti i hartuar nga deputetet Senida Mesi dhe Rudina Hajdari bën apel për të gjitha palët politike se vendi ndodhet në një moment kritik, kur duhet bashkëpunimi i të gjithëve për të arritur një aspiratë të të gjithë shqiptarëve. “Me anë të kësaj projektrezolute kërkohet që institucionet shqiptare të vijojnë të përqendruara në reformat e ndërmarra dhe t’i përfundojnë ato në respektim të kuadrit kushtetues e ligjor në fuqi”, thuhet ndër të tjera në dokumentin e Kuvendit. Në këtë draftrezolutë me 10 pika, Kuvendi angazhohet më tej për ecurinë e reformave, ku një zë të rëndësishëm zënë Reforma Zgjedhore dhe ajo në Drejtësi. “1. Kuvendi i Shqipërisë vlerëson raportin e Komisionit Europian të datës 29.05.2019 dhe rekomandimet e tij për reformat e mëtejshme në kuadër të procesit të integrimit europian. 2. Vlerëson rolin e tij në drejtim të zhvillimit të dialogut gjithëpërfshirës, mbështetur në parimet demokratike, brenda kuadrit kushtetues dhe institucional mbi çështjet e integrimit europian. 3. Inkurajon forcimin e mëtejshëm të rolit të tij në mbikëqyrje të reformave integruese të vendit. 4. Thekson se angazhimi i qëndrueshëm institucional për përmbushjen e rekomandimeve të Komisionit Europian dhe përfundimeve të Këshillit Europian përbën përparësinë kryesore të punës së Kuvendit të Shqipërisë. 5. Mbështet Reformën në Drejtësi si një reformë kyçe e shumë e rëndësishme për qytetarët e Shqipërisë dhe inkurajon institucionet kompetente për ngritjen e organeve të reja të Reformës në Drejtësi, si Prokurorinë Speciale Kundër Korrupsionit ( SPAK), Byronë Kombëtare të Hetimit ( BKH) dhe Gjykatën Kushtetuese; 6. Kërkon nga organet ligjzbatuese rezultate konkrete dhe të vazhdueshme në luftën kundër korrupsionit, krimit të organizuar dhe të drejtave të njeriut. 7. Shpreh vullnet të plotë për të ecur në rrugën e reformave në frymën e mirëkuptimit ndërpartiak dhe në bashkëpunim të plotë me shoqërinë civile; 8. Shpreh vullnet të plotë për të çuar përpara reformën për garantimin e zgjedhjeve të lira dhe të ndershme, sipas parimeve demokratike dhe standardeve ndërkombëtare, në interes të qytetarëve shqiptarë. 9. Shpreh angazhim të plotë për mbikëqyrjen e përparësive të vendosura nga Komisioni Europian si kusht për çeljen e negociatave dhe nxitjen e qeverisë për zbatimin e këtyre përparësive. 10. Duke konsideruar që anëtarësimi i Republikës së Shqipërisë në Bashkimin Europian tejkalon çdo interes partiak, pasi mbështetet nga gati tërësia e qytetarëve”, thuhet në draftrezolutën e Kuvendit.