Tërmeti, Kuvendi seancë të posaçme për masat e marra
Banorët e Floqit, 4 muaj pas tërmetit protestojnë për dëmshpërblimet
Kuvendi i Shqipërisë diskutoi dje rreth tërmetit të 21 shtatorit dhe pasojave të tij, ndërsa deputetët e shumicës vlerësuan gatishmërinë e institucioneve për t’u ardhur në ndihmë të dëmtuarve.
Me ndryshimet e reja në rregulloren e Kuvendit të Shqipërisë është përcaktuar të mbahet një seancë plenare një herë në muaj për të diskutuar për problemet, që deputetët kanë evidentuar në takimet me zgjedhësit e tyre në zona. Ministrja e Mbrojtjes, Olta Xhaçka, tha dje se shteti u ngrit në këmbë për të përballuar emergjencën.” Që natën e datës 21, pra pak orë pas tërmetit, në Tiranë dhe Durrës u ngritën 9 qendra pritjeje, në strehët sociale, apo në çadrat e ngritura nga Forcat e Armatosura, për ata qytetarë që nuk mund të qëndronin në banesat e tyre për shkak të dëmtimit të tyre, ose të pasigurisë së qëndrimit në këto banesa”. Sipas saj, do të ketë rindërtim të çdo banese të dëmtuar. “Lajmi i mirë është që për rikuperimin dhe rindërtimin e çdo banese të prekur është çelur tashmë një fond i posaçëm, ku po kontribuojnë përveç qeverisë dhe institucioneve, edhe shumë biznese e individë apo edhe donatorë të huaj”, tha Xhaçka. Ish- ministri i Brendshëm, Fatmir Xhafaj, kërkoi që qeveria të bëjë transparencë lidhur me dëmet që janë shkaktuar, ndërsa kërkoi edhe hartimin e një strategjie për zonat që janë më problematike. “Tërmetin nuk mund ta parashikojmë, por dëmet mund t’i parandalojmë, qeveria duhet të përgatisë një strategji të qartë reflektimi, me një plan serioz reflektimi. Tërmeti na paralajmëroi, ne duhet të veprojmë se nesër mund të jetë shumë vonë”, deklaroi Xhafaj.
KORÇA Të dëmtuarit nga tërmeti i 1 qershorit në fshatrat e Korçës, edhe pas katër muajsh, janë në qiell të hapur. Shkak është bërë përllogaritja joreale e dëmeve të shkaktuara nga tërmeti, për pasojë dhe dëmshpërblimi që ata kanë marrë nuk mjafton për rindërtimin e shtëpive të tyre të dëmtuara. Për këtë, disa familje të fshatit Floq kanë protestuar ndaj këtij trajtimi që i kanë bërë instancat shtetërore. Tërmetet e 1 qershorit bënë që 124 shtëpi në fshatrat Floq, Qafëzez e Vidohovë të bëhen të pabanueshme, ndërsa qindra të tjera u dëmtuan edhe në fshatrat përreth, si pasojë e lëkundjeve të forta sizmike. Teksa janë njohur me vlerësimin që është caktuar për ta, 10 familje të fshatit Floq kanë protestuar, duke e konsideruar të pamjaftueshme vlerën e caktuar për ta. Ata madje kanë kërkuar një rivlerësim të dytë, ndërsa kanë pezulluar punimet në shtëpitë e tyre sepse e kanë të pamundur të likuidojnë pagesat me vlerën që u është caktuar nga shteti. “Atë që s’bëri perëndia, të na vriste me tërmetin, po e bën qeveria tani, po na vret kështu”, kanë deklaruar banorët. “Është e turpshme që një banesë që duhet bërë nga e para, të vlerësohet 3.7 mln lekë të vjetër. Me aq lekë, as një plevicë nuk ndërtohet. Kemi 4 muaj që presim dhe në kushtet që jemi, kemi treguar mirëkuptim maksimal, edhe pse duhet të ndodhte e kundërta në fakt. Kemi thirrur punëtorë e firma dhe kur i shohin shtëpitë në gjendjen që janë, na e bëjnë të qartë që me aq lekë s’bëjmë dot asgjë”, u shpreh një nga banorët e fshatit Floq.