Shmangia e radhëve, aplikimi për karta identiteti ndahet në 3 fasha kohore
Zv. ministrja e Brendshme: Atyre që u skadon ID në janar- prill aplikojnë në tetor, në maj- gusht, në nëntor, të tjerët në dhjetor
Zv. ministrja e Brendshme, Rovena Voda, u bëri sërish thirrje dje të gjithë qytetarëve që të verifikojnë datën e skadencës së kartave të identitetit, në mënyrë që t'i paraprijnë procesit të rinovimit të tyre dhe të shmangin radhët e mundshme kur duan të marrin karta të reja.
Gjatë vizitës në ambientet e aplikimit për dokumente biometrike në Bashkinë Kamzë, ajo shoqërohej nga kryebashkiakut, Rakip Suli, i cili u shpreh se po punohet për hapjen e zyrave të aplikimit edhe në Bathore, në mënyrë që të lehtësohet i gjithë procesi. Nga ana tjetër, zv. ministrja theksoi edhe njëherë që për lehtësimin e procesit të aplikimit është planifikuar që të bëhet një ndarje në 3 fasha të ndryshme kohore, përkatësisht në muajt tetor, nëntor dhe dhjetor. Duke folur për fushatën e ndërgjegjësimit të qytetarëve, Voda tha se ndodhej në Kamzë, bashkë me kryetarin e Bashkisë, Rakip Suli, për të vazhduar fushatën e ndërgjegjësimit për të gjithë qytetarët, jo vetëm të Tiranës, por edhe të bashkive të tjera si Kamza apo Laçi. "Kemi qenë edhe në bashki që janë pak më të vogla se bashkitë e mëdha, duke bërë një thirrje për qytetarët që të vijnë të aplikojnë, pasi situata tashmë e ambienteve ku ata aplikojnë, është krejt ndryshe me vitet më parë. Pikërisht këtu kemi 5 operatorë, të cilët janë në shërbim", u shpreh Voda. Duke folur rreth ndarjes në fasha kohore, ajo u shpreh se për të shmangur radhët, Ministria e Brendshme bashkë me kompaninë Aleat, kanë vendosur të ndajë aplikimin për karta në tri fasha kohore. "Do të thotë, atyre që u skadon karta në periudhën janar- prill, do të aplikojnë në tetor, pra kujt i skadon brenda janar- prill, do të aplikojë në tetor. Atyre që u skadon nga maji deri në gusht, do të vijnë të aplikojnë në nëntor dhe atyre që u skadon në shtator- dhjetor, do të vijnë të aplikojnë në muajin dhjetor", tha zv. ministrja. Ndërsa duke theksuar se në fund të vitit skadon afati i përdorimit të tyre, i shtyrë me vendim të Kuvendit të Shqipërisë, për shkak edhe të procesit të votimit, u bëri thirrje qytetarëve të respektojnë ndarjen në fasha kohore që të shmangin radhët.