Banka e Shqipërisë hedh në qarkullim kartëmonedhat e reja
Duke nisur nga dje, në treg kanë nisur të qarkullojnë prerjet e reja 200 lekë e 5000 lekë
Siç edhe ishte njoftuar më herët, Banka e Shqipërisë ka hedhur dje në treg kartëmonedhat e reja, përkatësisht prerjet 200 lekë dhe 5000 lekë.
Në aktivitetin e organizuar me këtë rast, me prani të nxënëseve dhe mësuesve të një shkolle 9- vjeçare në kryeqytet, janë prezantuar seritë e reja të k a r t ë - m o n e d h a v e . Zv. guvernatorja Natasha Ahmetaj vuri në dukje se kartëmonedhat 200 lekë dhe 5000 lekë, që janë hedhur për herë të parë në qarkullim, përtej funksionit bazë të tyre, mbartin edhe vlera artistike e simbolike të kombit dhe historisë së tij. Ahmetaj informoi nxënësit dhe të pranishmit për arsyen e mbajtjes të së njëjtës tematikë në pamjen e serisë së re të k a r t ë - monedhave shqiptare, duke e risjellë atë më të freskët në ngjyra e konfigurim. Ajo shtoi se tematika lidhet me evokimin e epokave të historisë së kombit shqiptar, përmes paraqitjes së portreteve të personaliteteve simbol të tyre, të cilët kanë lënë gjurmë në kujtesën kombëtare. Futja në qarkullim e kartëmonedhave të reja bëhet nëpërmjet sistemit bankar shqiptar. “Duke filluar që sot ( dje), datë 30 shtator 2019, bankat tregtare që janë furnizuar pranë Bankës së Shqipërisë kanë tërhequr kartëmonedhat e reja 200 lekë dhe 5000 lekë. Bankat e tjera tregtare do t’i tërheqin këto kartëmonedha sipas nevojave që do të kenë për kartëmonedhat 200 lekë dhe 5000 lekë. Kjo do të thotë se futja në qarkullim e kartëmonedhave të reja është një proces, i cili do të ndodhë gradualisht, ditë pas dite”, bën me dije BSH. Në këto kushte, kartëmonedhat ekzistuese të të gjitha prerjeve, do të vazhdojnë të qarkullojnë paralelisht me kartëmonedhat e reja. Veç prerjeve 200 dhe 5000 lekë, në qarkullim do të hidhen edhe kartëmonedhat e reja 500, 100 dhe 2000 lekë. Ndërkohë që për herë të parë, në treg do të futet edhe prerja 10 000 lekë.