Raporti i “Venecias”, Meta do përgjigjet brenda javës
Zëdhënësi i Presidentit, Blushi: Shterim kushtetues, ligjor, profesional dhe faktik, larg çdo ndikimi politik dhe të dyshimtë
Presidenca lajmëroi dje se brenda kësaj jave do të bëjë publik një raport për të shtjelluar opinionin e Komisionit të Venecias.
Nëpërmjet një statusi në “Facebook”, zëdhënësi i Presidentit, Tedi Blushi, shkroi dje se kreu i shtetit nuk ka shkelur asnjë nen të Kushtetutës me dekretin e firmosur më 10 qershor për anulimin e zgjedhjeve të 30 qershorit. Madje, Blushi theksoi se kreu i shtetit ka mbrojtur Kushtetutën dhe vendimin e Gjykatës së Strasburgut për të drejtën e zgjedhjes. “Brenda javës, institucioni i Presidentit të Republikës do të bëjë publik për opinionin vendës dhe ndërkombëtar raportin e tij për draftin e opinionit të Komisionit të Venecias, gjithmonë në vazhdim të transparencës dhe rëndësisë së çështjes në fjalë, që meriton vetëm shterim kushtetues, ligjor, profesional dhe faktik, larg çdo ndikimi politik dhe të dyshimtë. Zero shkelje të Kushtetutës! Mbrojtje e shkëlqyer e Kushtetutës! Mbrojtje e shkëlqyer e Konventës Europiane të të Drejtave të Njeriut! Mbrojtje e shkëlqyer e vendimit të Gjykatës së Strasburgut për të drejtën e zgjedhjes! Mbrojtje e shkëlqyer e detyrimeve ligjore që ka Shqipëria nga Marrëveshja e StabilizimAsociimit me Bashkimin Europian”, shkroi Blushi. REAGIMI
Presidenti Ilir Meta reagoi pak ditë më parë pas publikimit të raportit paraprak të Venecias, ku këmbënguli se ai nuk ka shkelur asnjë nen të Kushtetutës së Shqipërisë dhe se aktet e tij kanë qenë të justifikuara. “Kam bërë mbrojtje të shkëlqyer dhe parimore të Kushtetutës, pluralizmit politik, të drejtës së zgjedhjes sipas vetë Këshillit të Europës, Konventës Europaine të të Drejtave të Njeriut, sipas detyrimeve të pashmangshme që burojnë nga marrëveshja e Shqipërisë me BE- në për Marrëveshjen e Stabilizim- Asociimit, edhe sipas vetë vendimit të qartë që ka marrë Gjykata e Strasburgut për të sqaruar se zgjedhje nuk do të thotë procedurë dhe proces mekanik votimi”, tha Meta pak ditë më parë.