Basha letër bankave: Mos financoni PPP, pastrojnë para
"Këto projekte, jo vetëm që s'duhet të lejohen, por do të përbënin dhe kriminalizimin e institucionit që ka bashkëpunuar me to"
Kryedemokrati Lulzim Basha, siç kishte premtuar, u kërkoi dje bankave të nivelit të dytë në Shqipëri që të mos financojnë projektet e dyshimta koncesionare.
Nëpërmjet një letre që u drejtohet institucioneve financiare dhe ku vihet në dijeni edhe guvernatori i Bankës së Shqipërisë, Gent Sejko, kreu i selisë blu paralajmëron se koncesionet korruptive do të anulohen. Revokimi i lejeve, sipas Bashës, do të pamundësojë kthimin e parave që janë marrë me kredi nga kompanitë. "PD- ja ka një projekt të qartë dhe me masa drastike e konkrete për të luftuar këto fenomene dhe për të vënë përpara përgjegjësisë personat e përshirë në to. Të tilla janë, por pa u kufizuar vetëm në to, ngritja e strukturave që do të verifikojnë plotësimin e kushteve nga operatorët ekonomikë privatë, që kanë përfituar leje ndërtimi apo kontrata publike; mundësitë financiare që këta operatorë kanë pasur, duke i krahasuar me kostot reale të investimeve të kryera dhe çmimet e shitjes së produkteve e shërbimeve të tyre; gjurmimin e financimeve të tyre etj. Të gjitha këto masa do të shoqërohen, gjithashtu, me veprime të tjera nga ana e organeve tatimore/ ligjzbatuese, të tilla si revokimin e lejeve apo përfundimin e kontratave të dhëna në mashtrim me ligjin apo në kundërshtim me të, kalimin në favor të shtetit të të gjithë pasurisë së fituar nëpërmjet aktiviteteve të tilla apo të përfshirë në to etj.", shkruan Basha në letrën drejtuar bankave.
ANULIMI Koncesioni "Për projektimin, ndërtimin, dhe mirëmbajtjen e segmentit rrugor Milot- Balldren" dhe koncesioni "Për projektimin, ndërtimin dhe mirëmbajtjen e rrugës "Porti i jahteve- By- Pass Orikum- Dukat ( ura e Shën Elizës)" janë kontrata haptazi, që cenojnë interesin publik dhe dëmtojnë në mënyrë të rëndë interesat financiare të shtetit shqiptar, duke u siguruar përfitime të padrejta zyrtarëve të korruptuar dhe kompanive private ( shoqërisë "ANK" sh. p. k., shoqërisë "Bardh konstruksion" sh. p. k., shoqërisë "Gjikuria" sh. p. k. dhe shoqërisë "Rruga OrikumLlogara" sh. p. k.). Partia Demokratike e Shqipërisë dhe opozita e bashkuar, duke e vlerësuar të një rëndësie madhore për mbrojtjen e interesit publik stabilitetin e sistemit bankar në vend, vlerësoi të arsyeshme të informojë bankën tuaj mbi fatin e shpejtë që do të kenë këto dy projekte korruptive. Duke përfituar nga ky rast, ju kërkojmë zyrtarisht që të vlerësoni me seriozitet informacionin e përcjellë. Ne shprehim besimin e plotë që ju do të distancoheni dhe nuk do të bëheni palë në akte, që provojnë mbështetjen ndaj projekteve korruptive, që cenojnë interesin publik. Financimi i të tilla projekteve, të cilat qartësisht kanë si qëllim pastrimin e parave të trafiqeve dhe korrupsionit, jo vetëm që s'duhet të lejohet, por do të përbënte dhe kriminalizimin e atij personi a institucioni që ka bashkëpunuar në këtë drejtim. Prandaj, ne presim që banka juaj të aplikojë procesin e ' vigjilencës së zgjeruar' në çdo transaksion, ku përfshihen subjekte që janë angazhuar në aktivitetet e sipërcituara, veçanërisht, duke pasur parasysh indiciet që janë publike jo vetëm nga PD- ja, por edhe nga raportet e institucioneve të specializuara ndërkombëtare", shkruhej në letrën e Bashës.
KORRUPSIONI Prej shumë kohësh, PD- ja ka bërë publike faktin ( tashmë të pranuar edhe nga institucionet ndërkombëtare dhe institucionet ligjzbatuese të vendit), që vendi është përfshirë në kultivimin dhe tregtimin e lëndëve narkotike, si dhe është bërë rrugë transiti për lëndët narkotike nga vendet e ndryshme drejt Europës Perëndimore. I gjithë ky aktivitet i paligjshëm gjykohet që ka prodhuar miliarda euro, një pjesë e të cilave janë përdorur edhe për të paguar qeveritarët dhe punonjës publikë, në formën e korrupsionit. Kjo ka qenë arsyeja që PD- ja ka paralajmëruar se shumë aktorë janë përfshirë në operacione të mbështetura nga të njëjtët punonjës publikë ( përfshi nivelet më të larta të qeverisë), për të pastruar paratë e përfituara nga kultivimi dhe trafikimi i lëndëve narkotike apo/ dhe korrupsioni. Ne kemi tërhequr vëmendjen se, në veçanti, në bashkëpunim me njëri- tjetrin, punonjës publikë të korruptuar dhe kompani afër këtyre të fundit po përdorin sektorin e ndërtimit si mjet për të financuar dhe pastruar paratë e fituara nga aktivitete të paligjshme. Sistemi bankar është më i ekspozuari ndër shumë sektorë të tjerë për t'u përdorur për këtë qëllim nga të tilla subjekte. Në fund, më lejoni t'ju shpreh angazhimin tonë, që me të njëjtën forcë që do të godasim dhe luftojmë fenomenet negative dhe personat e përfshirë në to, me të njëjtën forcë dhe vullnet do të mbështesim të gjithë ata operatorë dhe subjekte që besojnë në konkurrencën dhe tregun e ndershëm, si dhe punojnë në përputhje me ligjet e vendit dhe praktikat e gjithëpranuara ndërkombëtare.