Meta, në Estoni: Mbështetje për integrimin
“Më 18 tetor presim lajm të mirë nga Këshilli Europian për negociatat”
Presidenti Meta, në ditën e parë të vizitës së tij zyrtare në Estoni, është pritur nga Presidentja e Estonisë, Kersti Kaljulaid. Në takim me Presidenten estoneze, Meta ka shprehur falënderimet për mbështetjen e vazhdueshme të këtij vendi në procesin e integrimit europian të Shqipërisë, duke theksuar se më 18 tetor Shqipëria shpreson të marrë lajmin e mirë nga Këshilli i Bashkimit Europian, për çeljen e negociatave të anëtarësimit në BE. Dy krerët e shteteve firmosën edhe një memorandum bashkëpunimi për procesin e Integrimit Europian mes dy vendeve. Në njoftimin zyrtar të zyrës së shtypit të Presidentit thuhet se Meta e vlerësoi këtë memorandum si një mundësi të shkëlqyer për Shqipërinë, që të mësojë nga përvoja estoneze në këtë fushë. “Më duhet të them që kemi pasur një shkëmbim pikëpamjesh shumë të frytshme për shumë çështje me interes të përbashkët. Ne ndajmë të njëjtat vlerësime për sfidat e sigurisë në Europë, mbi zhvillimet në rajonet tona dhe proceset e integrimit euroatlantik, si dhe për nevojën për të intensifikuar bashkëpunimin ekonomik midis Shqipërisë dhe Estonisë. E falënderoj Presidenten Kaljulaid për mbështetjen e vazhdueshme të Estonisë në procesin e integrimit europian të vendit tim. Ne presim që më 18 tetor të marrim lajmin e mirë nga Këshilli i Bashkimit Europian, për çeljen e negociatave të anëtarësimit të Shqipërisë në BE”, u shpreh Meta ndër të tjera në fjalën e mbajtur në kryeqytetin estonez, Talin. Meta, në këtë vizitë të parë të një presidenti shqiptar në Estoni, është pritur nga Kryeministri i Estonisë, Jüri Ratas, dhe nga kreu i Kuvendit estonez, Henn Polluaas.