Raporti sekret, Shqipëria e mbushur me kanabis
TIRANE - Ndonëse 2019 pritej të ishte viti që do t’i jepte fund lulëzimit të kanabisit në vendin tonë, duket se një gjë e tillë nuk ka ndodhur. Ajo që ka ndryshuar është fakti se, tanimë Policia mban sekret të dhënat për asgjësimin e bimëve narkotike. Vetëm në javën e fundit të muajit shtator, Policia e Shtetit ka asgjësuar mijëra bimë narkotike, ku operacionet kanë qenë të shtrira në qytete si Vlorë, Shkodër, Krujë, Gjirokastër, Librazhd dhe Kukës. Vetëm në Krujë ka pasur me dhjetëra persona të arrestuar për dyndjen e zonave malore me kanabis sativa. Ndërsa Librazhdi, i cili deri tani nuk është njohur për këtë fenomen, duket se ka hyrë dhe ai në “vallen” e kultivimit të drogës bashkë me Kukësin. Në Njësinë Administrative Orenjë të Librazhdit, në fund të muajit shtator, janë asgjësuar gati 3 mijë bimë narkotike. Kanabisi kultivohej në Malin e Merçitit, ku të përfshirë, përveç kultivuesve, është edhe një punonjës Policie dhe një inxhinier pyjesh. Edhe pse më parë Kukësi nuk është njohur si zonë për kultivimin e kanabisit, vitin e fundit policia ka zbuluar shumë parcela me bimë narkotike. Lidhur me aksionet e ditëve të fundit antikanabis, Shërbimi për Çështjet e Brendshme dhe Ankesave ka nisur hetimet për të gjithë punonjësit e policive të zonave që kanë administrative pasi nuk kanë ushtruar detyrën për kontrollin e zonës që kanë në ngarkim. Përveç disa punonjës të Policisë së Shtetit në hetim janë dhe punonjës pyjesh, administratorë të njësive lokale si dhe kryepleq fshatrash.