“Izet Haxhia kallëzon Sali Berishën për 23 krime”
Prokuroria për Krime të Rënda i mori dje deklarim Haxhisë
Izet Haxhia ka bërë kallëzim penal ndaj ish- Kryeministrit Sali Berisha dhe për këtë dha deklarime në Prokurorinë për Krime të Rënda. Lajmi bëhet i ditur nga avokati i Haxhisë, Idajet Beqiri, i cili tha dje për gazetën "Panorama" se Haxhia akuzon Berishën për rreth 23 krime dhe deklarimet e djeshme ishin nisja e një procedimi penal për këtë rast. "Sot filloi sipari i regjistrimit të procedimit penal, me kallëzues Izet Haxhinë kundër Sali Berishës dhe bashkëpunëtorëve të tij, në kryerjen e një numri të konsiderueshëm krimesh, nga vrasje deri në akte terroriste, vjedhje, grabitje. Prokuroria e Krimeve të Rënda nisi marrjen e deklarimeve të Izet Haxhisë", tha avokati Idajet Beqiri. Kujtojmë se rreth një javë më parë, Gjykata e Tiranës vendosi që të kalojë për kompetencë dosjen, për të cilën po rigjykohet Izet Haxhia në Gjykatën për Krime të Rënda. Me pretendimin se vrasjet e funksionarëve publikë nuk janë në kompetencën e Prokurorisë dhe Gjykatës së rrethit, dosja e vrasjes së deputetit të PD- së, Azem Hajdari, do të rigjykohet nga Krimet e Rënda deri në krijimin e Strukturës së Posaçme Antikorupsion. Prej më shumë se 5 muajsh, dosja e së ashtuquajturës "Vrasja e shekullit" pret rishqyrtimin gjyqësor, nga i cili Izet Haxhia, ish- truproja e ish Kryeministrit Sali Berisha, kërkon të marrë pafajësi. Gjykata e Apelit Tiranë vendosi në 19 mars të pranojë kërkesën e ish- truprojës së Sali Berishës që të dëgjohet dhe të japë versionin e tij për një nga ngjarjet më të diskutuara ndër vite. Ai është dënuar si një nga autorët e vrasjes së Azem Hajdarit, por nuk e ka pranuar asnjëherë vrasjen dhe ka hedhur akuza ndaj politikës si përgjegjëse. Për rreth 17 vite, Haxhia ka qenë jashtë Shqipërisë, ndërsa në vitin 2006 u arrestua në Turqi, për ekzekutimin e vendimit të Gjykatës së Shkallës së Parë dhe të Dytë në Tiranë, por deri në maj të vitit që lamë pas, nuk u ekstradua asnjëherë. Dakord me kërkesën për rigjykim ishte edhe Prokuroria, që e konsideroi atë si një të drejtë të të dënuarit për t'u mbrojtur dhe dhënë versionin e tij, në kushtet e një gjykimi dhe dënimi të dhënë në mungesë.