Gara për Kryeprokurorin, si do vlerësohen kandidatët
Integriteti, profesionalizmi dhe morali janë kriteret e vlerësimit
Këshilli i Lartë i Prokurorisë përcaktoi gjatë mbledhjes së kësaj të marte metodologjinë e vlerësimit për tre kandidatët për Prokuror të Përgjithshëm, ndërsa miratimi i rregullores do të bëhet në një tjetër mbledhje, pasi anëtarët kërkuan më shumë kohë.
Në përfundim të mbledhjes, zëvendëskryetari i KLPsë, Alfred Balla, duke iu përgjigjur interesit të mediave, tha se ishte përcaktuar mënyra se si do të bëhej vlerësimi për kandidatët, por për shkak se anëtarët kërkuan të njihen me disa dokumente, miratimi do të bëhej në një moment të dytë. "U kërkua nga disa anëtarë që të njihen, të kenë materiale shtesë, që në mbledhjen e ardhshme ta miratojmë. Në draft ne nuk kemi bërë gjë tjetër, veçse kemi bërë në mënyrë të imët vetë rregulloren tonë. Në rregullore është përcaktuar se kriteret për Kryeprokuror lidhen me integritetin profesional, moral, aftësinë akademike", tha Balla.
SPAK Balla iu përgjigj edhe pyetjeve për Strukturën e Posaçme Antikorrupsion, konstituimi i së cilës ka mbetur pezull për shkak të procesit të vetingut. Brenda tetorit, tha nënkryetari i KLP- së, do të kemi një vendimmarrje në lidhje me numrin e prokurorëve që do ngrihet SPAK. "Jemi në pritje të mbarimit të procedurave të ankimimit për dy kandidatë të SPAK- ut. Është Këshilli që do vendosë nëse do fillojmë me 10 apo me më pak se 10. Brenda muajit tetor mund të kemi një vendimmarrje", tha ndër të tjera nënkryetari i KLP- së.
KANDIDATËT Kryeprokurorja e përkohshme Arta Marku ka mbaruar studimet e larta dhe magjistraturën në Universitetin e Tiranës. Pasi ka kryer stazhin për 2 vjet në Prokurorinë e Fierit, ka ushtruar funksionin si prokurore në Prokurorinë e Rrethit Gjyqësor Shkodër, për 15 vite. Për 7 vjet ka qenë drejtuese e Njësisë së Përbashkët Hetimore për Krimin Ekonomik dhe Korrupsionin në Prokurorinë e Rrethit Shkodër, si dhe zëvendësdrejtuese e Prokurorisë së Rrethit Gjyqësor Shkodër. Fatjona Memçaj, aktualisht prokurore në Prokurorinë e Apelit Tiranë, në vitin 2003 mbante postin e prokurores së Rrethit në Tiranë. Në vitin 2007, Memçaj ka punuar si drejtoreshë e Koordinimit Ligjor në Presidencë, detyrë të cilën e ka mbajtur deri në fund të vitit 2012. Më pas, Memçaj është emëruar drejtore kabineti në Prokurorinë e Përgjithshme dhe prej vitit 2013, mban pozicionin e prokurores së Apelit në Tiranë. Gjithashtu, Memçaj është përfshirë edhe në mësimdhënie. Më herët, drejtues i Prokurorisë për Krime të Rënda dhe aktualisht prokuror të në këtë prokurori, Olsian Çela ishte kandidatura e parë e dorëzuar pranë KLP- së. Prokurori Olsian Çela ka punuar në Prokurorinë e Tiranës, pasi përfundoi magjistraturën në vitet 1998- 1999. Gjithashtu, ka kryer edhe një sërë trajnimesh e specializimesh brenda dhe jashtë Shqipërisë për hetimin e trafiqeve të paligjshme dhe krimit të organizuar.