KPA shqyrton të dhënat e DSIK për kandidatin e Kushtetueses

Komisioneri Publik rrëzoi dje provat e dorëzuara nga prokurori i Krimeve të Rënda, Besnik Muçi, duke thënë se u qëndron pikave të ankimit sa u takon problemeve të konstatuara me pasurinë. Kujtojmë se prokurori, njëherësh edhe kandidati për Gjykatën Kushtetuese, u konfirmua rreth një vit më parë nga KPK- ja, që e konsideroi të përshtatshëm në të tria kriteret, por vendimi u ankimua nga Komisioneri Publik, ankim që po shqyrtohet aktualisht nga Kolegji i Posaçëm i Apelimit. Ndërkohë, prokurori Muçi dorëzoi dy prova të tjera në seancën e djeshme, ndërsa kundërshtoi marrjen e raportit të Drejtorisë së Sigurimit të Informacionit të Klasifikuar ( DSIK) në shqyrtim, pasi është jashtë objektit të ankimit. Teksa rrëzoi pretendimet për pasurinë, prokurori tha se po ngarkohej me rrethana, që për subjekte të tjera kishin kaluar lehtë. Pas pretendimeve të palëve, trupi gjykues, pasi u tërhoq për disa minuta, vendosi me shumicë votash që të pranojë shqyrtimin e raportit sekret të DSIK- ut për prokurorin Besnik Muçi. "Trupi gjykues, me shumicë votash, vendosi të pranojë kërkesën e Komisionerit Publik për marrjen si provë të informacionit të përcjellë nga DSIK pranë Komisionerit Publik më datë 16.11.2018, si dhe vendosi t'ia përcjellë këtë dokument subjektit të rivlerësimit pasi të kenë përfunduar procedurat e deklasifikimit të tij. Gjatë parashtrimit mbi vlerën provuese të provave të depozituara nga subjekti i rivlerësimit në seancën paraardhëse, Komisioneri Publik deklaroi se as me këto akte të reja, subjekti i rivlerësimit nuk arrin të provojë bindshëm burimin e ligjshëm të krijimit të pasurisë së tij dhe të personave të lidhur me të", njoftoi KPA.