Ndahet nga jeta tenori që luajti rolin e Skënderbeut
Tenori i njohur Gjon Athanasi ( 1925- 2019) është shuar në moshën 94- vjeçare në Shtetet e Bashkuara të Amerikës, aty ku prej 25 vitesh jetonte. Ai edhe u lind në Shtetet e Bashkuara të Amerikës, sepse prindërit i kishin emigruar që prej vitit 1915. Për disa vite radhazi, familja e tij punoi për përmirësimin e gjendjes ekonomike në Massachusetts, për t’u kthyer më pas sërish në Shqipëri. Ndonëse bënë përpjekje për t’u larguar sërish gjatë Luftës së Dytë Botërore edhe më pas në komunizëm, kjo do të ishte e pamundur. Lidhjet e tij me këngën janë të kahershme, që në vegjëli nisi që të këndojë psalmet bizantine në kishën ku babai i tij ushtronte profesionin e klerikut ( prift ortodoks).
Ajo që do ta bëjë të pavdekshëm në kujtesën e publikut Gjon Athanasin, është roli i Skënderbeut në operën me të njëjtin emër, e shkruar nga kompozitori Prenk Jakova. Kompozitori, përpos që vlerësonte zërin e tenorit Athanasi, e shkroi rolin e heroit tonë kombëtar, Gjergj Kastriot Skënderbeut, në mënyrë që t’i përshtatej vokalit dhe figurës së artistit.
Nën regjinë e mjeshtrit të skenës teatrore, Pirro Manit, roli i Skënderbeut tek opera e cilësuar si vepra e parë historike në muzikën shqiptare, do të ngulitej gjatë te spektatori, duke e konsideruar si një nga arritjet e tij më të mira artistike.
Gjon Athanasi ka lënë në repertorin e tij shumë arie të njohura, por nuk kanë munguar as këngët popullore, patriotike dhe partizane. Ka punuar edhe si pedagog në Institutin e Lartë të Arteve, përreth 20 vjet.