SHBA: S’mbështesim asnjë kandidat, respektojmë qytetarët
Kadri Veseli u përfol si “kandidati i SHBA”, përgënjeshtruan edhe vendet e tjera të Quint- it
Fushata zgjedhore në Kosovë ka marrë reagimet e SHBA dhe ambasadorëve të vendeve të tjera të fuqishme në Kosovë, pas akuzave se kreu i PDK- së, Kadri Veseli, po bën fushatë duke u paraqitur si kandidati që do të forcojë lidhjet me SHBA e BE.
Në një poster të madh të vendosur në ndërtesën e PDK- së, shfaqet Veseli me Presidentin amerikan, Donald Trump. Posteri ka rënë në sy të amerikanëve dhe ka qenë gazeta “New York Post”, që ka publikuar një artikull se si Veseli po përpiqet të “përdorë” SHBA për të fituar zgjedhjet. Ndërkohë, për PDK- në dhe Veselin po bën fushatë edhe një shtetas amerikan, ish- zyrtar i administratës amerikane, Matt Witaker, i cili ka thënë në Gjilan se Kadri Veseli është mik i Shteteve të Bashkuara dhe mik i Iowa- s. Whitaker u ka bërë thirrje qytetarëve të Kosovës që të votojnë në këto zgjedhje për Veselin dhe një parti që e forcon raportin me Amerikën dhe jo dikush që e izolon dhe rrezikon marrëdhëniet. Ambasada Amerikane në Kosovë ka thënë se nuk e përkrah asnjë kandidat apo parti për zgjedhjet e 6 tetorit. Ky reagim besohet të ketë ardhur pas shkrimeve se PDK- ja po përkrahjet nga “njeriu i Trump”. “Qeveria e SHBAve nuk parapëlqen dhe nuk mbështet ndonjë parti politike apo kandidat në zgjedhjet e kësaj jave. Ne respektojmë të drejtën dhe përgjegjësinë e votuesve të Kosovës që të zgjedhin të ardhmen e tyre”, thuhet në këtë njoftim. SHBA është bërë pjesë e një mesazhi të përbashkët edhe me ambasadorët e tjerë të Francës, Gjermanisë, Italisë e Mbretërisë së Bashkuar, se “Çdo sugjerim se qeveritë tona përkrahin ndonjë parti apo kandidat të veçantë në zgjedhje, është i pasaktë”, thuhet në deklaratën e ambasadorëve të Quint- it.