Balla: Partitë të marrin përgjegjësitë, ODIHR foli për zgjedhjet
Kur na ndajnë më pak se dy javë nga përgjigjja e Këshillit Europian për çeljen e negociatave, kryetari i Grupit Parlamentar të PS- së, Taulant Balla, kërkon nga opozita që të marrë përgjegjësitë e saj në këtë proces. Në fjalën e tij në Komisionin e Integrimit, ditën e djeshme, Balla tha se rrugën e Shqipërisë drejt BE- së nuk mund ta frenojë askush. “Pa dyshim që të gjitha partitë politike duhet të marrin përgjegjësitë e tyre në këtë proces. Është një proces ku të gjitha palët kanë detyrime. Kushdo që u mundua të pengonte Reformën në Drejtësi, besoj që e ka marrë mesazhin e qartë. Kushdo që u mundua të pengonte zgjedhjet e 30 qershorit, e ka marrë mesazhin e qartë, kjo edhe nga raporti paraprak i Komisionit të Venecias apo nga raporti përfundimtar i ODIHR”, tha Balla. Në mbledhjen e parë të Komisionit të Integrimit, pas vendimit të Bundestagut gjerman që mandaton qeverinë që të votojë pro Shqipërisë më 17- tetor, Balla tha se 9 pikat e rezolutës nuk janë kushte, por detyra shtëpie. “Do të theksoja se Reforma në Drejtësi është reforma thelbësore dhe guri i themelit, mbi të cilin është ngritur qoftë vlerësimi pozitiv nga ana e KE në 29 maj të këtij viti, qoftë dhe vlerësimi nga ana e Bundestagut gjerman në seancën e shkuar, ku u ritheksua dhe një herë fakti që Shqipëria ka bërë hapa të rëndësishëm në rrugën europiane. Dua ta bashkëndaj me ju sot që çështjet e ngritura nga Bundestagu janë detyra shtëpie, për të cilat ne duhet të intensifikojmë punën për plotësimin dhe realizimin e tyre. Qoftë Reforma e plotë Zgjedhore, qoftë plotësimi i vendeve vakante në Gjykatën Kushtetuese apo Gjykatën e Lartë, përmbyllja e ngritjes së institucioneve të reja si SPAK dhe BKH, janë të gjitha në rrugë të mbarë”, tha Balla.