Negociatat, Bushati: Kërkohet konsensus mbipartiak në Kuvend
“Kuvendi të nxisë ngritjen e Kushtetueses dhe SPAK- ut brenda 2019”
Ish- ministri i Jashtëm, Ditmir Bushati, ka bërë një kërkesë me 9 amendamente në projektrezolutën e Kuvendit të Shqipërisë për procesin e hapjes së negociatave me Bashkimin Europian.
Në materialin e dërguar Kuvendit, Bushati kërkon konsensus mbipartiak në Kuvend sa u takon çështjeve të integrimit. “Roli mbikëqyrës dhe nxitës i Kuvendit bëhet gjithnjë e më i pazëvendësueshëm, pasi procesi i bisedimeve të anëtarësimit kërkon konsensus mbipartiak që mund të jetësohet në Kuvend”, shkruan Bushati. Ai kërkon që të përcillet fryma unanime e parlamentarëve shqiptarë për fillimin e bisedimeve për anëtarësim të Shqipërisë me Bashkimin Europian. “Projektrezoluta duhet të pasqyrojë me korrektësi faktet që e kanë shoqëruar vendin tonë në këtë proces, duke njohur progresin e arritur dhe skicuar rrugën drejt tryezës së bisedimeve për anëtarësim, me fokus të veçantë rolin e Kuvendit në këtë proces”, shkruan Bushati ndër të tjera në amendamentin e tij parashtruar Kuvendit. Më tej, deputeti i PS- së kërkon të bëhen ndryshime në pikat 5 dhe 8, duke kërkuar nga Kuvendi që të marrë angazhim për të mbështetur ngritjen e strukturave të reja të drejtësisë, Gjykatës Kushtetuese, Gjykatës së Lartë, Prokurorisë Speciale Kundër Korrupsionit ( SPAK) dhe Byrosë Kombëtare të Hetimit ( BKH), brenda vitit 2019. Ndryshimet në këto pika, sipas Bushatit, synojnë vendosjen e theksit te përmbushja e disa angazhimeve parësore në procesin e anëtarësimit të Shqipërisë në Bashkimin Europian e që lidhen drejtpërdrejt me miratimin e Reformës Zgjedhore në përmbushje të rekomandimeve të OSBE- ODIHR, me funksionimin e disa prej organeve kyçe të Reformës në Drejtësi, si dhe me nevojën për të konsoliduar ritmin e reformave në fusha, që kanë pikëprerje me sundimin e së drejtës. Gjithashtu, ai kërkon që projektrezolutës me 10 pika t’i shtohet edhe një pikë e 11- të, ku t’i kërkohet Këshillit të Ministrave që të paraqesë brenda datës 31 tetorit 2019 planin e punës, metodologjinë, planifikimin e burimeve njerëzore dhe financiare në mbështetje të procesit të bisedimeve për anëtarësim me Bashkimin Europian. Deputeti socialist shton se vendi duhet të demonstrojë që në Konferencën e Parë Ndërqeveritare, gatishmërinë dhe kapacitetin për të ndërmarrë e zbatuar me rigorozitet të gjitha angazhimet që burojnë nga ky proces.