Draftraporti i Venecias: Meta tejkaloi Kushtetutën, jo shkelje për shkarkim
Komisioni i Venecias, më 27 shtator, iu dërgoi institucioneve shqiptare, Presidencës dhe Kuvendit të Shqipërisë, raportin e tij paraprak në lidhje me ligjshmërinë e kreut të shtetit për të anuluar datën e zgjedhjeve lokale të 30 qershorit. Raporti, mbi bazën e të cilit do të zhvillohet edhe seanca në datën 11 tetor në Strasburg, i përbërë nga 29 faqe, arrin në konkluzionin se Presidenti i Republikës, Ilir Meta, ka tejkaluar kompetencat kushtetuese me anulimin e 30 qershorit, duke sqaruar se një vendim i tillë duhej të merret vetëm në një situatë që plotëson kriteret për marrjen e masave të jashtëzakonshme. Por edhe pse e konsideron një tejkalim kompetence, Venecia nuk e cilëson shkelje të rëndë, që do të çonte në shkarkimin e Presidentit. Sa i takon shkarkimit të Metës, “Venecia” sqaron se një vendim i tillë i takon Kuvendit dhe më pas Gjykatës Kushtetuese. “Bojkoti zgjedhor nga partitë politike, edhe nëse ato përfaqësojnë një pjesë të rëndësishme të elektoratit, nuk mund të parandalojë që të bëhen zgjedhje të rregullta. Përndryshe, këto parti do të merrnin levën për të parandaluar plotësisht çdo zgjedhje. Kështu, Presidenti i tejkaloi kompetencat e tij sipas Kushtetutës, duke anuluar së pari e duke shtyrë më pas zgjedhjet lokale. Është detyrë e Asamblesë dhe në fund e Gjykatës Kushtetuese të përcaktojë nëse kjo ka të bëjë me ‘ shkelje serioze’, të cilat do të lejonin një shkarkim të Presidentit”, thuhet në raportin e Venecias. Edhe pse një institucion që merret me interpretimin juridik, Komisioni i Venecias nuk i shpëton edhe argumentit politik, kur thotë se “shkarkimi i Presidentit do të zvogëlonte ose rriste tensionet dhe në fund të fundit do të shërbente ose do të frustronte qëllimin e kontrolleve të ndërsjella dhe ekuilibrave, në një situatë ku Parlamenti dhe të gjitha komunat janë të mbizotëruara nga njëra palë. A do t’i shërbente ndjekja e një opsioni të tillë, të shkarkimit, unitetit të popullit dhe për sa i përket optikës ndërkombëtare, do t’i jepte kredibilitet shtetit shqiptar?”.