Rama: Merkel vlerësoi pastrimin e Drejtësisë
“Kancelarja tha se Shqipëria nuk ka Gjykatë Kushtetuese, sepse pastroi sistemin e korruptuar të drejtësisë”
Mungesa e Gjykatës Kushtetuese dhe e Gjykatës së Lartë, për Kryeministrin Rama është shprehje e pastrimit të sistemit të drejtësisë nga gjykatësit e korruptuar.
Gjatë fjalës së tij në takimin rajonal me ministrat e Drejtësisë së Ballkanit Perëndimor, të organizuar dje në Tiranë, Kryeministri Rama bëri publik detaje sesi Kancelarja gjermane, Angela Merkel, mori ‘ PO- në’ dhe bindi Bundestagun gjerman që të vendoste pro hapjes së negociatave për Shqipërinë. Rama u shpreh se Merkel u tha deputetëve gjermanë se: Ishim ne që i kërkuam shqiptarëve që ta pastronin sistemin, a kanë faj që e pastruan sistemin dhe nuk ka Gjykatë Kushtetuese, a duhet t’u hedhim faj apo t’i përgëzojmë? “Tani cili është problemi? Tani problem është që nuk kemi Gjykatë Kushtetuese. Po, por ne na u tha që duhet të pastronim sistemin e drejtësisë nga të korruptuarit. Kështu që kur po bën operacion te trupi i dikujt, duhet parë nga cili këndvështrim e sheh, sepse shyqyr Zotit që ka ende njerëz, pra, burra e gra të mençura në Europë, të cilët vazhdojnë t’u referohen të vdekurve, që i kemi përmendur. Angela Merkel është kampione e kësaj gjëje dhe ajo ka thënë një gjë, të cilën dua ta dëgjojnë të gjithë dhe u dëgjua në fakt nga grupi parlamentar. Ne po themi që Shqipëria nuk ka Gjykatë Kushtetuese dhe që ky është dështim, më fal, por unë citoj Kancelaren gjermane, a ishim ne që iu kërkuam shqiptarëve që të pastronin sistemin dhe a kanë faj ata që e pastruan sistemin, e bënë atë dhe tani që u pastrua sistemi nuk ka Gjykatë Kushtetuese dhe duhet t’u hedhim faj për këtë gjë, apo t’i përgëzojmë për këtë punë që kanë bërë”, tha Rama. Ai tha se shumë shpejt vendi do të ketë Gjykatë Kushtetuese funksionale. “Natyrisht që kur nuk Gjykatë Kushtetuese funksionale, nuk mund të jesh shtet anëtar, por ne nuk po kërkojmë të jemi shtet anëtar, ne thjesht po kërkojmë që të vazhdojmë një rrugëtim që do të dojë e do kërkojë shumë kohë, një kohë të gjatë. Kjo do të thotë që hapi tjetër do të jetë sigurisht hapi që do të kemi një Gjykatë Kushtetuese funksionale. Por fakti që nuk ka Gjykatë Kushtetuese funksionale në këtë moment, tregon sukses, jo dështim. Të paktën ekziston një person në Komunitetin Europian që mendon si unë e kam thënë dhe e them ngaherë, tashmë jemi dy. Shyqyr që personi tjetër ka mundësinë që ta bëjë Gjermaninë që të thotë ‘ PO’. Unë nuk e arrita dot”, tha Rama.
SPASTRIMI Kryeministri Edi Rama tha se integrimi në Bashkimin Europian është një rrugëtim, të cilin Shqipëria e meriton, duke e argumentuar këtë me faktin që vendi ynë i plotësoi kushtet e vendosura. Kreu i qeverisë u kthye pas në kohë, një vit më parë, në nisje të Reformës në Drejtësi, kur u kërkua që të përjashtoheshin nga sistemi 57 gjyqtarë dhe prokurorë të korruptuar. “Tani më duhet të bëj një koment, vjet, për shembull, na thanë që keni bërë një punë fantastike, por keni ende diçka për të bërë. 57 gjyqtarë dhe prokurorë, një numër magjik, nuk e dija pse do ishte kjo shifër 57 dhe jo 58, ose pse jo 56, por thashë 57. Epo mirë, kabaja e shtyrjes dhe ne shkuam përtej 57- ës, shumë më shumë se 57 dhe procesi i rivlerësimit, vetingu u bë revolucioni ynë francez me gijotinën. Çdo mëngjes, në çdo televizion shqiptar, të gjithë këta që ishin të paprekshëm, të paprekshmit kalonin te komisionet e vetingut dhe dukeshin si të dobët dhe gjithë ata që shkarkoheshin e shkarkoheshin e hiqeshin nga sistemi, pra, forca e korrupsionit në Shqipëri. Korrupsioni për 30 vite është rritur dhe gjendet te politikanët dhe tek autoritetet publike, por më besoni kur ju them, nuk ka të krahasuar me qarkun e të paprekshmëve që u zhbë tashmë njëherë e mirë, të gjyqtarëve dhe prokurorëve. Ata ishin forca dhe pushteti i korrupsionit, ata ishin ata që e garantonin dhe ushqenin korrupsionin dhe gjithçka ishte bërë relative. Dhe pas 1 vit nuk flasim më për 57, por më shumë se 100”, tha Kryeministri në fjalën e tij.