Tabaku: ‘ Venecia’ rrëzon të gjitha ligjet e miratuara nga maxhoranca në 6 vite
Ish- deputetja e Partisë Demokratike, Jorida Tabaku, tha dje në një deklaratë për shtyp se opinioni i Komisionit të Venecias për çështjen e pronave tregon qartë se ligjet për tokën, të hartuara nga kjo qeveri, janë antikushtetuese edhe kanë paqartësi. Sipas Tabakut, mendimi i "Venecias" reflekton atë që ka denoncuar PD- ja në këto 6 vite në të gjithë ligjet për pronën. "Komisioni i Venecias ka dalë në përfundimin se edhe ligji i ri për ' Tokën', është në kundërshti me të drejtat e njeriut dhe nuk merr parasysh të drejtat e sanksionuara në konventat ndërkombëtare të njeriut. Ashtu si çdo ligj tjetër që kanë hartuar për pronën, gjithë paketës ligjore i mungon qartësia, - thotë Venecia,- i mungon saktësia dhe, ç'është më e rëndësishme, ka një fuqi shumë të gjerë rregulluese të Këshillit të Ministrave, ka mungesë të hapave proceduralë dhe afate të caktuara qartë. Me këtë paragraf Komisioni Venecias përmbledh shumë qartë çdo gjë që ka bërë qeveria për pronën: ka shkelur Kushtetutën, ka zaptuar pronën private dhe publike, ka marrë kompetenca që nuk i takojnë, duke ndarë prona private dhe publike me Korporatën e investimeve", tha Tabaku. Ish- deputetja bëri një mea culpa kur tha se PDja nuk e zgjidhi problemin e pronës kur ishte në pushtet, por Tabaku u shpreh se opozita ka tashmë një plan të qartë për të çuar tokën te pronarët e vërtetë, ndërsa u zotua se ligjet që janë miratuar në këto 6 vite do të anulohen. "Me vetëdijen se gjatë qeverisjes sonë nuk i dhamë zgjidhje çështjes së pronës, Partia Demokratike e ka njohur Komisionin e Venecias me një plan të ri të opozitës për të zgjidhur problemin e pronave. Partia Demokratike në qeveri do të pezullojë të gjitha ligjet antikushtetuese, që mohojnë të drejtën e pronës si Ligji i Investimeve Strategjike, Ligji për Kompensimin e Pronës të vitit 2015, Ligjin e Kadastrës dhe ligjet e tjera në lidhje me pronën", tha Tabaku.