“Statistikat monetare”, FMN vlerëson Bankën e Shqipërisë
FMN: Të llogaritet edhe valuta, e cila qarkullon jashtë vendit
Fondi Monetar Ndërkombëtar ka vlerësuar Bankën e Shqipërisë për mënyrën se si harton dhe shpërndan informacionet për statistikat monetare dhe financiare për bankën qendrore, institucionet e tjera depozituese dhe korporata të tjera financiare.
RAPORTI Sipas një raporti të publikuar dje nga “Monitor”, Banka e Shqipërisë harton dhe shpërndan rregullisht statistikat monetare dhe financiare për tre nënsektorët e sektorit financiar: banka qendrore, institucionet depozituese dhe korporatat e tjera financiare. Banka ka shprehur interes të madh për krijimin e statistikave të flukseve monetare, si dhe detaje të hollësishme të llogarive financiare nga kush te cili. Këto të dhëna sigurojnë njohuri shtesë për të kuptuar lidhjet në të gjithë sektorët e ekonomisë, zbulojnë zhbalancimet dhe ofrojnë njohuri të rëndësishme për adresimin e tyre. P. sh., në raportimin e depozitave dhe kredive, këto të dhëna do të eliminonin efektin e kursit të këmbimit. Komiteti i Politikës Monetare ka kërkuar zhvillimin e serive të statistikave monetare si një mjet shtesë për të kuptuar zhvillimet e parasë dhe të kreditit në ekonominë shqiptare. Në mënyrë të ngjashme, llogaritë financiare nga sektorët dhe bilancet financiare konsiderohen gjithnjë e më të rëndësishme për analizën e stabilitetit financiar dhe zhvillimeve të tjera makroekonomike. FMN- ja thekson që misioni ka gjetur se cilësia e të dhënave që raporton Banka e Shqipërisë është e lartë dhe ka rekomanduar që banka të fillojë hartimin dhe publikimin e serive të statistikave monetare dhe financiare nga marsi 2020, ( me të dhëna që prej janarit 2017) dhe llogari financiare vjetore për të gjithë sektorët, nga fundi i 2019- ës ( për 2017 dhe 2018). Llogaritë e plota financiare të sektorit duhet të publikohen së bashku me bilancet financiare sektoriale ( tashmë të publikuara), të cilat do të rrisin dobinë e të dyja grupeve të të dhënave. FMN- ja konstaton se Banka e Shqipërisë publikon të dhëna të detajuara dhe të shpejta. Rekomandimi Një prej rekomandimeve të FMN- së është që Banka e Shqipërisë të tentojë të llogarisë valutën që qarkullon jashtë kanaleve bankare në vend, e cila sot nuk është e disponueshme. “BSH të shikojë përqasjen e ndjekur nga vendet e tjera, ku ekziston bashkëqarkullimi i monedhave të huaja dhe vendëse për të eksploruar metodologjinë, e cila mund të jetë përshtatur për të marrë vlerësime të vlerës së valutës së huaj, që qarkullon jashtë sistemit bankar”, rekomandon FMN- ja.