SPAK me 8 anëtarë, pritet vetingu për 7 prokurorë
Informacioni i ONM, shtyn seancën për kandidaten e SPAK
Gjatë javës së fundit, Institucioni i Komisionerëve Publikë ka njoftuar mosankimimin e 3 prokurorëve të konfirmuar në Shkallën e Parë të Vetingut, duke çuar në 8 numrin e anëtarëve të Strukturës së Posaçme Antikorrupsion.
Kujtojmë se Këshilli i Lartë i Prokurorisë, pas përzgjedhjes së 15 prokurorëve më të mirë, është duke pritur procesin e vetingut për t'i emëruar ata si prokurorë të posaçëm. Ndërkohë, "llogari" të hapura me procesin e rivlerësimit kanë 7 prokurorë, ndërsa më herët, kreu i KLP, Gent Ibrahimi, është shprehur se po shikohet mundësia që SPAK të ngrihet me më pak se 10 prokurorë. Gjatë tetorit pritet që Këshilli të marrë një vendim për këtë çështje, në kushtet kur në dispozicion tashmë ka 8 prokurorë, që automatikisht me konfirmimin në të dyja shkallët e vetingut, janë anëtarë të Prokurorisë së Posaçme.
VETINGU Komisioni i Pavarur i Kualifikimit do të zhvillonte dje seancën dëgjimore me drejtuesen e Prokurorisë së Durrësit, Anita Jella, por një informacion i ri, i dorëzuar nga Operacioni Ndërkombëtar i Monitorimit ( ONM), bëri që treshja gjykuese të shtyjë seancën. "Operacioni Ndërkombëtar i Monitorimit ka depozituar të dhëna të reja pranë Komisionit dhe ka kryer kërkesë për të shtyrë seancën dëgjimore për të bërë të mundur që organet e vetingut të hetojnë me objektivitet të gjithë elementët e rinj që janë vënë në dijeni së fundmi, të lidhur me procesin e rivlerësimit për subjektin, zonjën Anita Jella", tha kryesuesja e trupit gjykues. Jella është edhe një nga 15 kandidatet për SPAK. Ndërkohë, Komisioni ka njoftuar se në datën 7, në seancën dëgjimore do të dalë prokurori Ndini Tavani, tjetër kandidat i përzgjedhur nga KLP për të qenë pjesë e SPAK. Para KPK, në ditët në vazhdim pritet të dalin tre kandidatët e fundit të Strukturës së Posaçme, prokurorët e Krimeve të Rënda, Anton Martin dhe Doloreza Musabelliu, si dhe drejtuesja e Prokurorisë së Tiranës, Elizabeta Imeraj. Këshilli i Lartë i Prokurorisë, në 16 korrik, miratoi listën e 15 prokurorëve që pas procedurës së përzgjedhjes për të qenë pjesë e Strukturës së Posaçme Antikorrupsion, morën pikët më të larta. Surpriza e listës së miratuar nga KLP është mungesa e drejtueses së Prokurorisë së Krimeve të Rënda, Donika Prela, dhe ish- drejtuesit të kësaj Prokurorie, Besim Hajdarmatajt.