Esmeralda Cami zëvendëson Gentian Osmanin në KLP

Ish- drejtuesja e Prokurorisë së Dibrës, Esmeralda Cami, do të jetë anëtarja e re e Këshillit të Lartë të Prokurorisë. Cami u zgjodh dje në Mbledhjen e Përgjithshme të Prokurorëve, ku u votua nga 133 kolegë të saj për zëvendësimin e anëtarit të shkarkuar nga procesi i vetingut, Gentian Osmani. Në garë për anëtar të KLP- së ishte edhe prokurori i Krimeve të Rënda, Vladimir Mara, i cili nuk arriti të marrë dot besimin e kolegëve të tij. "Qëllimi im do jetë të përfaqësoj Prokurorët dhe t'i ndihmoj ata në ushtrimin e detyrës dhe në kushtet, në të cilat po ushtrojnë detyrën prokurorët në gjithë Shqipërinë", u shpreh Esmeralda Cami Keshi. Kjo e fundit ka mbaruar Shkollën e Magjistraturës në vitin 2009 dhe është emëruar si prokurore në Prokurorinë e Dibrës. Në vitin 2013, është promovuar si drejtuese e Prokurorisë së Dibrës, detyrë të cilën e ka kryer prej 6 vitesh. Prokurori Gentian Osmani u shkarkua nga Kolegji i Posaçëm i Apelimit, pasi më herët ishte konsideruar i përshtatshëm nga Shkalla e Parë. Pas ankimimit të vendimit nga Komisioneri Publik, KPA e gjeti të pajustifikuar pasurinë e Osmanit dhe e shkarkoi atë. Më herët, ka qenë ish- prokurorja Antoneta Sevdari, e cila u shkarkua nga Shkalla e Dytë e organeve të vetingut, duke e lënë KLP me 10 anëtarë. Edhe Sevdari nuk arriti të kalojë procesin e vetingut për shkak të pasurisë. Largimi i ishprokurores është një nga vendimet më të kontestuara të organeve të vetingut, pasi kundër kanë qenë edhe vëzhguesit ndërkombëtarë, të cilët, me anë të një opinioni, shprehnin rezerva për interpretimin që Kolegji i kishte bërë ligjit në këtë rast. Plotësimi i KLP- së me 11 anëtarë, para pikëzimit të kandidatëve për Kryeprokuror ishte mjaft i rëndësishëm, në kushtet kur në rastet e një Këshilli me 10 anëtarë, vota e kryetarit është vendimtare, duke prishur kështu balancat.