"Fiskalizimi", ashpërsohen masat për bizneset me shkelje
Qeveria ka vendosur të ashpërsojë masat për bizneset që do të konstatohen me shkelje të përsëritura. Ndryshimet e reja fiskale, që do të zyrtarizohen vitin e ardhshëm, parashikojnë gjoba, të cilat variojnë nga 50 deri në 150 mijë lekë për moslëshim të kuponit, si edhe mosinstalim të programit të ri të fiskalizimit. Kështu, për bizneset e vogla, pra me xhiro deri në 2 milionë lekë në vit, me ndryshimet e bëra në ligjin për tatimet, gjoba do të jetë 50,000 lekë. Ndërsa për bizneset me xhiro nga 2 milionë deri në 14 milionë do të jetë 100,000 lekë dhe për bizneset e mëdha, pra me xhiro mbi 14 milionë lekë, gjoba do të jetë 150,000 lekë. Ndërkohë, bizneset që do të konstatohen me shkelje të përsëritura deri në dy herë, gjobat do të variojnë nga 100 mijë lekë deri në 300 lekë. Veç kësaj, do të bëhet vlerësim tatimor për periudhat e fundit të pavlerësuara, por jo më tepër se tre muaj. Më tej, ndaj biznesit merret masa e bllokimit të veprimtarisë në vendin ku është konstatuar shkelja për 30 ditë kalendarike, e cila hiqet nëse tatimpaguesi paguan penalitetet e vendosura. Nga ana tjetër, lehtësi janë bërë sa i takon industrisë automative, duke përcaktuar një normë 5% për tatimfitimin për bizneset që bëhen pjesë e saj, teksa norma e taksimit për bizneset e tjera është 15 %. Sipas Ministrisë së Financave, kjo incentivë fiskale për industrinë që merret me prodhimin e pjesëve për automjetet ka si qëllim jo vetëm të ndihmojë vendin tonë që të konkurrojë në këtë sektor me vendet e rajonit, por dhe të mundësojë tërheqjen e investimeve në këtë industri dhe çfarë është më e rëndësishme, hapjen e vendeve të reja të punës. Programi i ri, që do të zëvendësojë atë aktualin në kasat fiskale, bën të mundur raportimin në kohë reale të çdo transaksioni që bën biznesi. Pra, çdo shitje e një produkti, nga çdo biznes do të dalë në kohë reale edhe në sistemin tatimor. Kjo platformë e re elektronike do të jetë e detyrueshme për më shumë se 160 mijë biznese që operojnë në vendin tonë. Pavarësisht kërkesës së biznesit për të shtyrë zbatimin e ligjin të fiskalizimit, qeveria është treguar e vendosur duke bërë të qartë se ky projekt i ri do të nisë zbatimin duke filluar nga janari i vitit 2020.