Basha: Kriza zgjidhet me zgjedhje lokale e parlamentare në një ditë
“Mosshkarkimi i Kajmakut dhe Babanit tregon se s’ka shtet ligjor, jo të gjithë të barabartë para ligjit, kjo situatë do të marrë fund”
Kryedemokrati Lulzim Basha tha dje në një deklaratë për mediat pas takimit me reporterët e Këshillit të Europës se vetëm zgjedhjet e parakohshme parlamentare dhe lokale mund të zgjidhin krizën politike në të cilën ndodhet vendi prej disa muajsh.
Opozita sipas Bashës është e gatshme që të jap kontributin e saj për të zgjidhur krizën, që kalon fillimisht nga përfundimi i Reformës Zgjedhore sipas kushteve të vendosura nga Bundestagu. “Partia Demokratike dhe opozita e bashkuar kanë prezantuar një plan të qartë prej 5 pikash për të përshpejtuar fazën e parë, atë të Reformës Zgjedhore dhe, pastaj, duke u garantuar qytetarëve lirinë e votës, duke u garantuar qytetarëve shqiptarë të gjitha kushtet për zgjedhje të lira dhe të ndershme, mbajtjen sa më parë të zgjedhjeve të parakohshme parlamentare. Ne jemi të hapur për të gjithë instrumentet që garantojnë rrugën përpara, rrugën që kalon përmes miratimit të Reformës Zgjedhore, garantimit të vullnetit politik, më e rëndësishmja për zgjedhje të lira dhe të ndershme dhe zgjedhjeve të parakohshme parlamentare dhe zgjedhjeve vendore kushtetuese të mbajtura në një ditë”, tha Basha. Sipas kreut demokrat, në Shqipëri ka dy qëndrime, nga njëra anë qëndron opozita e bashkuar, që sipas tij përfaqëson shumicën dhe që do demokracinë dhe nga ana tjetër qeveria, e cila nuk punon në interes të qytetarëve. Ndryshe nga herët e tjera, Basha nuk foli me ultimatume, por i bëri thirrje PSsë që të reflektojë. “Nuk është kurrë vonë për të reflektuar, ndaj dhe thirrja ime ndaj PS- së është të reflektojë sa nuk është vonë. Natyrisht, kjo nuk është një situatë që mund të vazhdojë pa fund, ndërkohë që ne përgatisim ofertën tonë, jo vetëm për Reformën Elektorale, por për të nxjerrë vendin nga kjo krizë, të jeni të sigurt që edhe durimit të njerëzve po i vjen fundi dhe as Edi Rama dhe as kushdo tjetër nuk mund të mendojë se do të vazhdojë ta trajtojë Shqipërinë si çifligun e vet dhe shqiptarët si bujkrobërit e vet. Ka ardhur koha të ndërtojmë një demokraci ku çdo shqiptar të ndihet aksionar dhe pjesëtar i përfshirë dhe i përfaqësuar në këtë demokraci, institucione që nuk i takojnë botës së krimit dhe oligarkëve dhe u shërbejnë botës së krimit dhe oligarkëve, por institucionet që u takojnë të gjithë shqiptarëve”, vijoi Basha.
KAJMAKU Kryetari i Partisë Demokratike akuzoi institucionet ligjzbatuese se zbatojnë ligjin me dy standarde. Mosshkarkimi i kryebashkiakut të Vorës, Agim Kajmakut dhe kryebashkiakut të Vaut të Dejës, Mark Babani, dhe nga ana tjetër arrestimi i një fshatari që shet perime, tregon se para ligjit nuk janë të gjithë të barabartë. “E rëndësishme është që të fokusohemi se përse nuk zbatohet ligji. Pse Kajmaku i Vorës apo Babani i Vaut të Dejës mbahen akoma në detyrë. Këto janë pyetje që duhet t’i drejtoni Edi Ramës. Këto janë pyetje që duhet t’i drejtoni institucioneve të kapura, të cilat zbulojnë një të vërtetë të thjeshtë: që në Shqipëri nuk ka shtet ligjor, që ligji nuk është i barabartë për të gjithë. Që një nënë nga fshatrat e Tiranës merret dhe keqtrajtohet, sepse shet një tufë sallatë, speca apo domate në rrugët e Tiranës, që një baba burgoset për 3 mijë lekë të reja ne diskorkodancë totale me faturat e energjisë, ndërkohë që, pushtetarëve të kapur në afera korruptive, të lidhur me krimin apo në shkelje të ligjit të Dekriminalizimit, nuk u hyn gjemb në këmbë”, përfundoi Basha.