“Kajmaku”, KQZ vendos të premten për kryebashkiakun
“Zëri i Amerikës”: Vendimi i pafajësisë, Kajmakut s’i shpëton mandatin
Komisioni Qendror i Zgjedhjeve do të mblidhet ditën e premte për të vendosur nëse do të shkarkojë kryebashkiakun e Vorës, Agim Kajmakun, apo jo.
Mbledhja e KQZ- së është thirrur nga kryetari Klement Zguri dhe ka në rend dite vetëm një pikë: “Shqyrtimin e rezultatit të verifikimit të Prokurorisë së Përgjithshme për funksionarin publik, z. Agim Ymer Kajmaku, me funksion kryetar i Bashkisë Vorë, Qarku Tiranë, në zbatim të ligjit nr. 138/ 2015 ‘ Për garantimin e integritetit të personave që zgjidhen, emërohen ose ushtrojnë funksione publike”, thuhet në letrën e KQZ- së. Por mësohet se KQZ do t’i kërkojë Prokurorisë të gjithë praktikën që ndoqi për verifikimin e figurës së Kajmakut. Dy ditë më parë, në Komisionin Qendror të Zgjedhjeve mbërriti shkresa e Prokurorisë së Përgjithshme, e cila konfirmoi se shtetasi Agim Kajmaku është i njëjti person, i cili në vitin 2003 është arrestuar në Greqi me akuzën e përdorimit dhe shpërndarjes së parave të falsifikuara. Rezultati i verifikimit të Prokurorisë po shqyrtohet nga të 5 anëtarët e KQZ- së, por, sipas burimeve të gazetës “Panorama”, nuk ka ende një konkluzion përfundimtar sesi do të votohet. Ata pohuan se rasti ha interpretim. Të njëjtat burime pohojnë se ka vetëm një detaj që mund të “shpëtojë” Kajmakun, që është vendimi i pafajësisë. Por kjo shpresë mund t’i shuhet nëse në organin e Akuzës në Shqipëri dhe në KQZ nuk vjen letërporosia e organeve të drejtësisë greke për vendimin ndaj Kajmakut dhe që sqaron nëse kryebashkiaku i Vorës ka pasur dijeni apo jo në lidhje me procedurën hetimore ndaj tij. Në shkresën që Prokuroria e Përgjithshme i dërgoi dy ditë më parë Komisionit Qendror të Zgjedhjeve, sqarohej se Prokuroria ka dërguar dy kërkesa për informacion deri tani, por nuk ka marrë asnjë përgjigje. “Me shkresë nr. 931/ 2 Prot, datë 30.08.2019, i është kërkuar Ministrisë së Drejtësisë, të komunikojë me autoritetet e drejtësisë së Republikës së Greqisë për të siguruar informacion dhe dokumentacion në lidhje me arrestime/ ndalime: masa e sigurisë personale, vendim dënimi penal: vendime dëbimi, në emër të shtetasit Agim Kajmaku alias Jorgo Toto. Kjo kërkesë është përcjellë nga Ministria e Drejtësisë te Ministria e Drejtësisë e Greqisë, më datë 4.09.2019”, thuhet në dokumentin e Prokurorisë shqiptare. Ndërkohë, dy javë më vonë, institucioni i drejtuar nga Arta Marku, pasi nuk ka marrë përgjigje, ka nisur një tjetër kërkesë për informacion. Por ende edhe sot përgjigjja nuk ka ardhur.
ZËRI I AMERIKËS Sipas një artikulli të “Zërit të Amerikës”, kryebashkiaku i Vorës nuk ka rrugë tjetër, veçse të shkarkohet. Ndonëse ai ka marrë vendimin e Gjykatës së Janinës në shtator për pafajsinë, Kajmaku penalizohet për faktin se nuk ka deklaruar në formularin e vetëdeklarimit se ndaj tij ka pasur një proces hetimor nga institucionet e huaja ligjzbatuese. “Prokuroria shqiptare u vu në lëvizje pas denoncimit nga Partia Demokratike, e cila publikoi dokumente mbi arrestimin e zotit Kajmaku në Greqi, nën emrin
Jorgo Toto dhe hetimin e nisur ndaj tij. Kryebashkiaku socialist mohoi në mënyrë të përsëritur akuzat e PD- së, duke këmbëngulur se nuk është arrestuar ndonjëherë në Greqi e duke folur për një ‘ sulm politik’ ndaj tij. Por krahasimi i shenjave të gishtërinjve mes atyre të marrë nga autoritetet greke në 2003 dhe atyre të zotit Kajmaku, vërtetuan se bëhej fjalë për të njëjtin person. Vetëm pas kësaj, kryebashkiaku dorëzoi pranë autoriteteve vendimin e shtatorit të këtij viti të Gjykatës së Janinë, që e shpallte atë të pafajshëm, ndonëse më parë kishte mohuar çdo fakt që e lidhte atë me ngjarjen e ndodhur në janar të vitit 2003, kur ishte arrestuar në flagrancë, pasi kishte qenë në zotërim të kartmonedhave false, ndërsa po tentonte të bënte një pagesë. Por kjo nuk e shpëton atë nga fakti se ai nuk e ka deklaruar arrestimin në Greqi në formularin e dekriminalizimit, gjë që sipas një vendimi të posaçëm të Parlamentit, çon në shkarkim të menjëhershëm nga detyra”, shkruan “Zëri i Amerikës”.