Zbardhet ligji i ri, kontroll teknik për shtëpitë e pallatet e ndërtuara para 1970
KATEGORITE E NDERTIMEVE QE PREKEN. SI DO VERIFIKOHEN GODINAT 50- VJEÇARE
Të gjitha objektet e ndërtuara para vitit 1970 do t’u nënshtrohen kontrollit teknik.
Qeveria ka ndërmarrë nismën “Për disa ndryshime në ligjin ‘ Për kontrollin dhe disiplinimin e punimeve të ndërtimit’”, në të cilin parashikohet që të inspektohet objektet mbi 50- vjeçare. Veç pallateve, kontroll do të kryhet edhe mbi vilat si edhe kinematë, teatrot, stadiumet dhe marketet. “Të gjitha objektet, të cilat kanë mbi 50 vjet që janë ndërtuar, i nënshtrohen procesit të auditimit teknik. Rregullat për mënyrën se si do të zbatohet auditimi dhe cilat do të jenë subjektet që do ta kryejnë atë përcaktohen me vendim të Këshillit të Ministrave”, thuhet në nenin 4 të draftit i cili ka kaluar në kuvend për diskutim.
NISMA Tërmetet e dy muajve të fundit janë alibia e qeverisë për këtë nismë. “Ky projektligj iniciohet në kuadër të situatës emergjente të krijuar nga dëmtimet që ka shkaktuar tërmeti i fuqishëm i datës 21 shtator 2019 në disa qytete të vendit, kohës së pamjaftueshme për rregullimet ligjore sipas procesit legjislativ dhe nevojës së menjëhershme për ndërtimin e riparimin e ndërtesave të dëmtuara”, thuhet që në nisje të relacionit që shoqëron draftin. Vetëm në kryeqytet, pallatet e ndërtuara para viteve ’ 70 janë ato rreth stadiumit Dinamo, Shallvaret, pallatet e aviatorëve dhe pallatet Agimi. Nisur nga vendndodhja e këtyre objekteve, të cilat përgjithësisht janë në zona të lakmuara, atëherë nuk është e vështirë të mendohet se pas këtij ligji të ri qëllimet shkojnë përtej mbrojtjes nga fenomenet natyre, siç janë tërmetet.
KONTROLLI Identifikimi i objekteve të ndërtuara para vitit ’ 70 do të pasohet nga auditi teknik. Që do të thotë se një grup ekspertësh do të paraqiten për të kontrolluar sigurinë teknike të pallatit apo shtëpisë. Në momentin që konstatohet se ky objekt nuk është i sigurt apo që rrezikohet, atëherë do të kërkohet nga banorët që të gjejnë një zgjidhje tjetër strehimi. OBJEKTET E TJERA Por krahas pallateve dhe vilave, kontrollit nuk do t’u shpëtojnë as objektet e tjera publike siç janë kinematë, teatrot, stadiumet dhe marketet. “Oponenca teknike për projektet e ndërtimit të objekteve do të kryhet nga institutet shtetërore ose ente të tjera, të përcaktuara nga ministria, që mbulon veprimtarinë e ndërtimeve, për të gjitha: ndërtimet publike; ndërtimet jopublike, me vlerë të preventuar, së paku, 100 milionë lekë dhe objektet me akses publik. Me “objekte me akses publik”, sipas këtij neni, do të kuptohen të gjitha objektet, ku, pavarësisht statusit të pronësisë së tyre, qytetarët kanë akses të lirë hyrjeje, si: kinema, teatro, stadiume, markete, etj.”, thuhet më tej në ligj. Këto ndryshime i japin dorë të lirë qeverisë, që në çdo rast, duke u justifikuar me mossigurinë e objektit, të ndërhyjë duke e shembur atë.
50
VJEÇARE është pragu për kontrollin teknik të objekteve. Kjo do të thotë që të gjitha objektet e ndërtuara para vitit 1970 do t’u nënshtrohen auditit teknik