Raporti, KLGJ tregon kaosin me ngarkesat e gjykatave
Komisioni tha se prokurori ka pasur kontakte të papërshtatshme
Prokurori i Krimeve të Rënda, Përparim Kulluri, u përball dje me dyshime për kontakte të papërshtatshme, mospërputhje deklarimesh për një pronë të shpronësuar nga shteti dhe shitjen e një makine.
Komisioni i Pavarur i Kualifikimit e kishte hetuar Kullurin në të tria kriteret e rivlerësimit: atë të pasurisë, aftësive profesionale dhe pastërtinë e figurës. Nga ana tjetër, gjetjet e Komisionit u kundërshtuan të gjitha nga prokurori, i cili në fund kërkoi konfirmimin në detyrë. Duke u përqendruar në problemet konstatuara nga Komisioni, Kulluri tha se do të ndalej shkurtimisht tek ato dhe ka mohuar të kishte dijeni për kontaktet e papërshtatshme të konstatuara nga Drejtoria e Sigurimit të Informacionit të Klasifikuar, por edhe nga KPK- ja. Për aftësitë profesionale, KLP- ja ka vlerësuar mirë prokurorin dhe nuk ka konstatuar probleme në etikën, integritetin dhe njohjen e ligjit.
PASURIA Në kriterin e pasurisë, ILDKPKI kishte dorëzuar një raport pozitiv për prokurorin, ndërsa KPK- ja tha se kishte kryer një hetim të pavarur për pasuritë e deklaruara. Nga hetimi për pasurinë, Komisioni vuri në dukje dy probleme. Së pari, është konstatuar mospërputhje e deklarimeve për sipërfaqen dhe vlerën e shpenzuar për ndërtimin e një lokali në vitin 1994 në Orikum. Ky lokal është prishur pasi prekej nga ndërtimi i shëtitores së Orikumit dhe më pas prokurori ka marrë dëmshpërblim. "Komisioni ka hetuar për pasurinë e shpronësuar, dyqan tregtie e ndërtuar që në 1994 në Orikum. Ky dyqan është prishur për interes publik, ku është ndërtuar shëtitorja e Orikumit. Për këtë pasuri janë gjetur mospërputhje të sipërfaqes dhe shumës së investuar fillimisht", tha Bekteshi. Ky pretendim i KPK- së për mospërputhje deklarimesh për pronën në Orikum u rrëzuan nga prokurori, i cili tha se ka pasur një lapsus në vendimin e Këshillit të Ministrave për sipërfaqen e shpronësuar, por ajo është deklaruar prej tij realisht. Ndërkohë, Komisioni kishte gjetur të pambuluar edhe blerjen e një makine, ku sipas KPK- së, nga analiza financiare rezultonte se prokurori nuk kishte pasur mundësi financiare për blerjen e saj dhe kryerjen e shpenzimeve të tjera. Është hetuar për një makinë të blerë për 21 mijë e 600 euro. Nga hetimi ka rezultuar se çmimi i makinës është paguar me këste. Duke iu referuar hetimit, ka rezultuar se subjekti gjendej në pamundësi financiare. Trupa gjykuese do të marrë në shqyrtim shpjegimet e subjektit gjatë marrjes së vendimit", tha Bekteshi. Ndërkohë, për pasuritë e tjera të deklaruara nga prokurori nuk u konstatuan probleme. PASTËRTIA E FIGURËS
Probleme u gjetën edhe në pastërtinë figurës për prokurorin e Krimeve të Rënda, që u konsiderua i papërshtatshëm nga një raport i Drejtorisë së Sigurimit të Informacionit të Klasifikuar. Sipas këtij raporti, ka dyshime se prokurori ka kontakte të papërshtatshme me persona të krimit të organizuar. "DSIK ka konstatuar se prokurori ka pasur kontakte të papërshtatshme, jorastësore dhe për një kohë të gjatë", tha Brunilda Bekteshi. Kjo e fundit shtoi se
Kulluri ka pasur kontakte të papërshtatshme me shtetasin A. B., i cili ka ndryshuar emrin në M. B.. Ky shtetas ka qenë i hetuar në Greqi për prodhim dhe shitje të narkotikëve. Është hetuar edhe nga Krimet e Rënda për të njëjtën vepër penale. Prokurori rezulton se ka lëvizur jashtë vendit me makinën e këtij personi", shtoi Bekteshi. Por këto gjetje të KPK- së u rrëzuan nga Kulluri, i cili gjatë mbrojtjes së tij pranoi përdorimin e makinës, por tha se ia kishte marrë një tjetër personi që ka në pronësi servis makinash dhe i kishte bërë disa shërbime mjetit. Më tej, prokurori pranoi njohjen me këtë person, por tha se nuk e kishte takuar atë që prej vitit 1990, kur ata kanë qenë studentë dhe ishin në një godinë. "Ky person rezulton se në vitin 2009 ka ndryshuar edhe emrin, unë nuk kam pasur dijeni për hetimet ndaj tij dhe nuk kam pasur asnjë kontakt me të", tha Kulluri.