“Dentistit” të Kamorras i sekuestrohen 750 mijë euro
Hapi biznese në Durrës me para të ardhura nga krimi
Sekuestrohet 750 mijë euro pasuri e në emër të “dentistit” të Kamorras, që fshihej në Durrës. Shtetasi italian Ferdinando Muolo, i dënuar me 8 vite burg në Itali për përfshirjen mes klaneve kriminale dhe porositës i një vrasjeje, i janë konfiskuar nga Policia e Durrësit: 5 apartamente banimi, me sipërfaqe 413.8 m2, 13 garazhe me sipërfaqe 622.7 m2, një automjet me vlerë 40 mijë euro dhe afro 10 mijë euro llogari bankare. Ky hetim ka nisur 18 muaj më parë. Prokuroria e Napolit, në përgjigje të kërkesës të Prokurorisë Durrës, konfirmoi se 56- vjeçari, banues në lagjen nr. 13, në Plazh Durrës, është i dënuar nga autoritetet e drejtësisë italiane, si pjesë e klaneve kamorriste në zonën e Napolit. Muolo ishte me leje qëndrimi në Shqipëri dhe ushtronte aktivitetin prej vitit 2012, ku ka regjistruar një shoqëri me objekt prodhimi dhe tregtimi i medikamenteve dhe pajisjeve dentare, në Tiranë, me 50% të aksioneve në pronësi të tij. Në vitin 2015 ka regjistruar shoqërinë me objekt prodhimi dhe tregtimi të pajisjeve mjekësore- kirurgjikale për larje dhe dezinfektim ambientesh, ku 45% të kuotave i posedon Ferdinando Muolo. Në vitin 2015 ka regjistruar shoqërinë me objekt laboratore dentare, ku ka 30% të kuotave. Në Itali, Muolo ishte dënuar se kishte porositur vrasjen e ortakut të tij me emrin Salvatore Pogniello Ridosso. Ata të dy u grindën në biznes dhe ndodhi vrasja, e cila më pas çoi në hakmarrjen e familjes Ridosso, ata paguan 100 mijë euro për vrasjen e Luigi Muollo, vëllait të Ferdinandit. Në atë kohë, lufta bëhej për sallat e pokerit, por edhe një kompani që merrej me materiale mjekësore. Gjithçka në atë kohë u zbulua nga një i penduar i Kamorras. Për t’i ikur luftës mes klaneve kamorriste, italiani 56- vjeçar kishte zgjedhur Durrësin si vendqëndrim, ku kishte rinisur biznesin. “Finalizohet operacioni policor i koduar ‘ Dentisti’. Në hetimin për pastrim parash startuar 18 muaj më parë, finalizohet operacioni për identifikimin, gjetjen dhe sekuestrimin, me qëllim konfiskimin dhe rikuperimin e pasurive që dyshohet se janë përfituar nga veprimtaria kriminale, vlera e të cilave përllogaritet në 750 euro dhe janë përfituar nga aktiviteti kriminal i shtetasit italian F. M., 56 vjeç, i dënuar me 8 vite burg në Itali, si pjesë e konflikteve mes klaneve kriminale dhe porositës i një vrasjeje”, tha zyrtarisht Policia e Shtetit. Ndërsa sqaroi se në këtë hetim, krahas bashkëpunimit ndërinstitucional ka pasur bashkëpunim me partnerët italianë, si dhe ndërmjet Prokurorisë së Durrësit dhe të Napolit.