Kryegjyqtari i Elbasanit, probleme në tri kriteret e rivlerësimit
Komisioni i Pavarur i Kualifikimit zhvilloi dje seancën dëgjimore me kreun e Gjykatës së Elbasanit, Sulejman Kurti, ndërsa nga hetimi administrativ rezultoi me probleme në tri kriteret e rivlerësimit. Sa i takon pasurisë, Komisioni kishte hetuar mbi një tokë truall dhe banesë në Elbasan, si dhe një apartament në Tiranë. Problemet me pasurinë të konstatuara nga Komisioni kishin të bënin me mungesë të burimeve të ligjshme për investimet në banesën në Elbasan, mospërputhje të deklarimeve për sipërfaqen e tokës. Relatori i çështjes, Lulzim Hamitaj, tha se sipas dokumentacionit të dorëzuar nga institucionet, sipërfaqja e ndërtimit nuk është 119.5 metra katrorë sa është deklaruar prej gjyqtarit, por rreth 352 metra katrorë. Më tej, Komisioni kishte konstatuar se leja e ndërtimit për katin e dytë në vitin 2005 ishte përfituar nga subjekti "Hoxha shp. k.", ndërsa si investitor ka rezultuar vetë gjyqtari Kurti. Sa i takon pastërtisë së figurës, Hamitaj relatoi se Drejtoria e Sigurimit të Informacionit të Klasifikuar kishte dorëzuar dy raporte për gjyqtarin. Në raportin fillestar, DSIK kishte konstatuar përshtatshmërinë e Kurtit, ndërsa në një raport të dytë pretendon se është i papërshtatshëm për vazhdimin e detyrës. Në seancë nuk u bënë të ditura më shumë detaje në lidhje me këtë raport, ndërsa gjyqtari tha se raporti nuk ishte i vërtetë dhe se duhej deklasifikuar, pasi nëse ka prova për përfshirjen e tij në afera korruptive, ishte i gatshëm të përballej më tej me ligjin. Sa i takon anës profesionale, raporti i dorëzuar nga KLDja për Kurtin ishte pozitiv dhe se nuk janë konstatuar shkelje gjatë ushtrimit të detyrës. Por disa probleme u gjetën nga KPKja pas analizimit të disa denoncimeve të bëra pranë këtij institucioni. Në një rast u ngritën dyshime se subjekti ka aplikuar akuza që lehtësonin pozitat e të pandehurve, ndryshe nga sa parashikonte ligji.