Ndryshon ligji, Tufa: E kërkova unë, u shkëputëm nga Kryeministri

Një ndryshim në ligjin për Institutin e Studimeve për Krimet dhe Pasojat e Komunizmit, i drejtuar nga Agron Tufa, u hamendësua si një tentativë e maxhorancës për ta larguar këtë të fundit nga postimi i drejtuesit që e mban aktualisht. Por tri nenet e ndryshuara nuk e kanë këtë qëllim dhe konfirmimi vjen nga vetë Tufa. Në një prononcim për gazetën “Panorama”, Tufa u shpreh se këto ndryshime ai i ka kërkuar prej kohësh dhe është diçka që e ndihmon institucionin, të cilin ai drejton, për ta bërë punën sa më mirë dhe nuk e prekin atë personalisht. “Unë e kam kërkuar vetë këtë gjë. Është një histori e vjetër që ne kërkuam zgjerim organike dhe na patën premtuar 4 pozicione dhe pastaj nuk u bënë. Kishte 4 vite që fondi digjej kot dhe unë e bëra këtë kërkesë. Ishte një kërkesë për të na shkëputur nga varësia e Kryeministrit. Kërkuam ndryshime sepse me ligjin siç ishte, çdo gjë varej nga Kryeministri dhe me sa kuptuam në këto 4 vite, Edi Rama nuk donte të firmoste. Tani, me këto ndryshime, fondi edhe për ne që do të kalojë si për të gjithë institucionet e tjera të pavarura. Formacionit enverist i ka shpëtuar ky projektligj. Ata janë totalisht të pavëmendshëm”, tha Tufa. Në një linjë me Agron Tufën ishte edhe deputeti socialist, Adnor Shameti, i cili u shpreh se nuk ka asnjë qëllim nga Grupi Parlamentar i PS- së për të larguar Tufën, por qëllimi ishte praktik. “Ndryshimet janë bërë pas kërkesës së vetë z. Tufa, në raportimin e fundit që ai bëri në Komisionin e Ligjeve. Ata kishin probleme me fondet dhe organikën dhe kaq”, tha Shameti. Sipas këtyre ndryshimeve të propozuara, kompetencat për propozimin e strukturës së institucionit i kalojnë Kuvendit. Me këto ndryshime, Instituti i Studimeve për Krimet dhe Pasojat e Komunizmit bëhet si institucionet e tjera, pasi deri më tani ka qenë i vetmi që ishte në varësi të Kryeministrit, çka ishte bërë edhe shkak për një bllokim 4- vjeçar sa i përket zgjerimit të stafit të tij.