Ademi: Duhen sa më shpejt zgjedhje, Këshilli Bashkiak s'ka mandat

Ndonëse mandati i saj kushtetues si kryebashkiake e Shkodrës ka mbaruar, Voltana Ademi vijon të drejtojë pushtetin lokal. Në një deklaratë për mediat ditën e djeshme, ajo ka sqaruar pozicionin e saj në krye të bashkisë. Ademi i referohet ligjit për vetëqeverisjen vendore dhe thotë se ai i jep të drejtë që të qëndrojë në karrigen e saj, derisa të zhvillohen zgjedhjet. Ndërkohë, Ademi apelon që të zhvillohet sa më shpejt të jetë e mundur ky proces. "Shkodra meriton të ketë zgjedhje. Kryetares së Bashkisë së Shkodrës, në bazë të Kushtetutës, i ka mbaruar mandati. Ushtron funksionin e kryetares së Bashkisë së Shkodrës, për shkak të ligjit për vetëqeverisjen vendore, deri në momentin që ne të kemi zgjedhje. Dhe duhet të kemi sa më parë, për t'iu dhënë mundësinë qytetarëve që të zgjedhin kryetaren apo kryetarin e bashkisë. Ky ushtrim i funksionit mbaron atë ditë dhe i përcillet mandatit tjetër menjëherë, sapo kjo të sigurohet nga zgjedhjet", tha Ademi në një konferencë për mediat. Partia Demokratike dhe aleatët e saj nuk morën pjesë në zgjedhjet e 30 qershorit dhe në këtë mënyrë, përbërja e Këshillit Bashkiak në Shkodër është vetëm me anëtarë të Partisë Socialiste dhe aleatëve të saj. E pyetur në lidhje me marrëdhëniet me Këshillin Bashkiak, kryetarja e vetme e bashkisë, e opozitës, Voltana Ademi, anatemoi zgjedhjet e 30 qershorit dhe tha se këshilli nuk përfaqëson vullnetin e popullit. "Procesi i 30 qershorit është një proces që tashmë është shpërfaqur ilegjitim. Me këtë dua të them se përfaqësimi i vetëm 6% të zgjedhësve, nëse mund të quhet i tillë, nuk është i mjaftueshëm për përfaqësimin në një organ vendimmarrës lokal, sikurse është Këshilli Bashkiak për të gjithë qytetarët e Shkodrës. Me këtë dua të them se kam dhënë shpjegimin dhe e ritheksoj, përfaqësimi i 6% të zgjedhësve nuk është përfaqësim i qytetarëve të Shkodrës", vijoi Ademi. Sakaq, mësohet se kryebashkiakja nuk merr pjesë në mbledhjet e Këshillit Bashkiak. Shkodra është e vetmja bashki në Shqipëri që drejtohet nga një demokrat, pas zgjedhjeve të 30 qershorit. Nga ky proces, në Shkodër u zgjodh kryetar bashkie Valdrin Pjetri, por ky i fundit dha dorëheqjen para se të betohej para Këshillit Bashkiak për të marrë detyrën, pasi rezultoi se ishte subjekt i ligjit të dekriminalizimit. Pjetri nuk kishte deklaruar në formularin e vetëdeklarimit një ngjarje në Itali, kur kishte qenë student. Kjo ngjarje u denoncua nga Partia Demokratike, e cila vijoi më pas me kryebashkiakun e Vorës, Agim Kajmakun, që u shkarkua pak ditë më parë dhe Mark Babanin, kryetarin e Vaut të dejës. Opozita e bashkuar zgjodhi të mos regjistrohej në zgjedhjet e 30 qershorit, pasi, sipas saj, qeveria e Edi Ramës nuk garantonte zgjedhje të ndershme. Mospjesëmarrja në zgjedhjet lokale të 30 qershorit ishte vendimi i dytë drastik i opozitës pas atij të shkurtit ku në bllok dogjën mandatet e deputetëve.