Avioni i drogës në Divjakë, ekstradohet nga Belgjika i kërkuari
TIRANE - Një nga personat e shpallur në kërkim ndërkombëtar dhe i dënuar në mungesë për trafik droge, me avionin i cili ra në plazhin e Divjakës në vitin 2014, është ekstraduar dje nga Belgjika. Burime zyrtare të Policisë së Shtetit thanë se nga specialistët e Interpol Tiranës u krye ekstradimi nga Belgjika drejt vendit tonë i shtetasit Kristjan Demçe, 43 vjeç, banues në Lushnje. Autoritetet policore belge, pas shkëmbimit në kohë reale të informacioneve me Policinë shqiptare nëpërmjet Interpol Tiranës, bënë të mundur kapjen dhe arrestimin e shtetasit Kristjan Demçe, me qëllim ekstradimin drejt Shqipërisë, në zbatim të urdhërarrestit ndërkombëtar të nxjerrë nga Zyra Qendrore Kombëtare Interpol Tirana. Gjykata e Krimeve të Rënda e ka dënuar këtë shtetas me 7 vjet e 4 muaj burg, për veprën penale "Trafikim i lëndëve narkotike, kryer në bashkëpunim". Shtetasi Kristjan Demçe, në bashkëpunim me disa shtetas të tjerë, në vitin 2014, ka tentuar të trafikojë lëndë narkotike kanabis sativa, në rrugë ajrore nga Shqipëria në Itali, me avionin e shtetasit italian Giorgio Riformato. Ky i fundit ka deklaruar në gjyq se nuk i njihte personat e tjerë të akuzuar. "Në plazhin e Divjakës u ula për shkak të një defekti teknik në avion. Me Saimir Bajramin nuk kam asnjë lidhje dhe as e njoh", është shprehur Riformato. Po ashtu, italiani nuk ka pranuar njohjen edhe me njërin prej të akuzuarve të tjerë, Sajmir Bajramin, ku ky i fundit ka rrëfyer dhe zbardhur para grupit hetimor linjën e trafikut të drogës me avion nga Shqipëria drejt Italisë.