KLP “zgjedh” Olsian Çelën për Kryeprokuror, Arta Marku del e dyta në listë
Kandidatët u vlerësuan për profesionalizmin, integritetin dhe aftësitë drejtuese. Lista do t'i dërgohet Kuvendit për votim
Këshilli i Lartë i Prokurorisë renditi të parin në listën e kandidatëve për Kryeprokuror Olsian Çelën, pas tij Arta Markun e të fundit Fatjona Memçajn.
Të tre pretendentët për Prokuror të Përgjithshëm, u vlerësuan për aftësitë profesionale, integritetin dhe aftësitë drejtuese. Dy ditë më parë, KLP, pasi kishte administruar më herët dokumentet e paraqitura nga kandidatët për punën dhe vlerat e tyre, dëgjoi në tri seanca dëgjimore platformën e tyre. Konkretisht, Çela ka marrë 459 pikë, Arta Marku 406 pikë dhe Fatjona Memçaj është vlerësuar me 362 pikë. Pas pikëzimit, nëse asnjë nga kandidatët nuk ankimon rezultatin brenda 3 ditësh, lista do t'i dërgohet Kuvendit, që ka kohë 30 ditë për të bërë votimin e 1 nga 3 kandidatët.
PLATFORMA E para që doli para KLPsë, ishte Arta Marku, e cila e nisi fjalën e saj duke folur për të shkuarën dhe eksperiencën e saj. Marku tha para anëtarëve të KLP, se nëse zgjidhej Kryeprokurore me mandat të plotë, do të përmirësonte treguesit e punës, rriste besimin e publikut në sistemin e Prokurorisë dhe do të punonte për tregues statistikorë të plotë dhe të saktë. Marku iu përgjigj edhe pyetjeve për ndikim politik, duke thënë se ajo kishte dhënë prova që është e pandikueshme dhe se të vetmen mbështetje që ka pasur, është ajo e ndërkombëtarëve. E dyta që doli para Këshillit, është prokurorja e Apelit të Tiranës, Fatjona Memçaj. Kjo e fundit e kishte mbështetur platformën e saj në monitorimin e punës së prokurorëve dhe zgjidhjes së problemeve që mund të kenë. Më tej, prokurorja tha se roli i Prokurorit të Përgjithshëm është që të sigurohet se respektohet ligji. Prokurori i Krimeve të Rënda, Olsian Çela, ishte i fundit që doli para KLP dhe parashtroi platformën e tij. Çela tha se nëse do të ishte Prokurori i Përgjithshëm, do të bënte ndryshime rrënjësore në këtë institucion, duke e bërë më interaktiv, pavarësisht cungimit të kompetencave.
Prokurori, në programin e tij, kishte evidentuar një sërë problemesh, një pjesë i konsideroi si "kronike" të sistemit dhe disa të tjera të krijuara rishtazi. Teksa foli për mosefikasitetin e politikave penale, Çela foli ashpër ndaj punës së bërë nga Prokuroria gjatë kësaj kohe. Në platformën e tij, prokurori i Krimeve të Rënda, tha se do të krijonte bashkëpunim me disa institucione dhe se do të monitoronte punën e prokurorëve, ku çdo 4 muaj do të zhvillonte një mbledhje me drejtues të prokurorive.
VLERËSIMI Aftësitë profesionale dhe aftësitë drejtuese kanë zënë peshën më të madhe të vlerësimit të tre kandidatëve. Kështu, për aftësitë profesionale që përfshijnë rezultatet e arritura në punë, në studime dhe në kërkimet shkencore, duke përfshirë edhe përvojën e punës, kandidatët mund të grumbullonin deri në 20 pikë. Për integritetin moral, ku përfshihet reputacioni profesional dhe shoqëror, mund të merrnin 4 pikë në total. Për aftësitë drejtuese, që do të vlerësohen nga cilësia e platformës dhe vizionit, aftësia vendimmarrëse, aftësia për të punuar në grup dhe aftësia për përfaqësim publik, kandidatët mund të grumbullonin 20 pikë. Gjithashtu, KLP do të vlerësojë kandidatët me pikë edhe për titujt akademikë, studimet dhe trajnimet afatgjata jashtë vendit dhe zotërimin e gjuhëve të huaja.