Basha: Rama kërkon një gjykatë politike
“Reformën në Drejtësi, sipas parimit të cilësisë, jo shpejtësisë ”
Kaosi i krijuar me ngritjen e Gjykatës Kushtetuese nuk mund të mos tërhiqte vëmendjen e kryedemokratit Lulzim Basha, i cili po vijon turin e tij të dëgjesave me përfaqësuesit e bizneseve. Nga Saranda ku ishte ditën e djeshme, Lulzim Basha akuzoi Kryeministrin Edi Rama se po tenton të kapë edhe Gjykatën Kushtetuese, duke u përpjekur të bllokojë procesin pas aktit noterial të Arta Vorpsit, që nga maxhoranca njihet si anëtare e Gjykatës Kushtetuese, por jo nga Presidenti. Qëllimi i kreut të qeverisë, sipas Bashës, është që një gjykatë me emërime politike të legjitimojë zgjedhjet e 30 qershorit. “Një Gjykatë Kushtetuese që nuk falet natën në Surrel, një Gjykatë Kushtetuese që nuk bëhet tenderim me përcaktim nga Ardian Dvorani, do të vendosë në mënyrë të pavarur dhe do të tregojë atë që treguan shqiptarët se 30 qershori ishte një proces fals. Është një grusht kushtetues, i cili ka për qëllim që qytetarët të kenë një kukull të regjimit”, tha kryedemokrati Basha. Referuar deklaratave të ambasadave pak ditë më parë, që mbështetën veprimin e Parlamentit që zgjodhi dy kandidaturat në një ditë, kreu i selisë blu e vuri theksin te cilësia e institucioneve të drejtësisë dhe jo te shpejtësia. “Faktori ndërkombëtar ka insistuar që institucionet e drejtësisë duhet të ngrihen në bazë të Kushtetutës dhe jo sipas tekave të Edi Ramës. Dua të paralajmëroj përkundrejt çdo deklarate sipërfaqësore, që e shikon zbatimin e Reformës në Drejtësi si çështje shpejtësie dhe jo cilësie. E dimë që janë vonuar, por është bërë me qëllim sepse i tremben drejtësisë së pavarur”, tha Basha. Në lidhje me betimin e Arta Vorpsit te noterja, reagoi edhe numri dy i PD- së, Gazment Bardhi. Ky i fundit e vlerëson si profesioniste Arta Vorpsin, por shton se ajo është detyruar nga politika që të ndërmarrë një akt të tillë. Bardhi e krahason situatën aktuale me atë të kohës së Hitlerit. “Çfarë është e mirë për Hitlerin, është ligjore. Të jem i sinqertë, Arta Vorpsin e njoh dhe në vlerësimin tim profesional, nuk ka njohje kaq të ulët mbi Kushtetutën. Prandaj, kushdo që e ka detyruar të bëjë këtë veprim, thjesht e ka dëmtuar përpara opinionit publik, duke i vënë etiketën e Arta Markut si ushtare e këtij pushteti, kundër shtetit të së drejtës”, shkroi Bardhi në “Facebook”.