Kushtetuesja, tri anëtaret betohen te Meta
Betohen Elsa Toska, Marsida Xhaferllari dhe Fiona Papajorgji
Elsa Toska, Marsida Xhaferlari dhe Fiona Papajorgji u betuan dje para kreut të shtetit si anëtaret më të reja të Gjykatës Kushtetuese.
Presidenti Ilir Meta u kujdes që t’i thërriste anëtaret e reja të Gjykatës Kushtetuese sipas radhës së përcaktuar nga Kushtetuta. Në njoftimet e shpërndara për mediat, kreu i shtetit sqaronte se cilën vakancë plotësonte secila nga anëtaret e betuara dje. E para që u betua me dorën në Kushtetutë para kreut të shtetit ishte Elsa Toska, e cila u zgjodh nga Parlamenti për vakancën e parë sa u përket anëtarëve që emëron Parlamenti. “Ky është plotësimi i vakancës së parë të Kuvendit, që zëvendëson ish- gjyqtarin, z. Vladimir Kristo. Duke vendosur dorën mbi Kushtetutën e Shqipërisë, gjyqtarja Toska u betua para Presidentit Meta: ‘ Betohem se gjatë kryerjes së detyrave të mia do t’i qëndroj kurdoherë besnike Kushtetutës të Republikës së Shqipërisë!’”, thuhet në njoftimin e Presidencës. E dyta që u betua para Presidentit ishte Marsida Xhaferllari, e cila ishte e zgjedhura e Presidentit për të plotësuar vakancën e dytë, që i përket Presidentit për plotësimin e Gjykatës Kushtetuese. Xhaferllari ishte e katërta e renditur nga Këshilli i Emërimeve në Drejtësi, në listën që iu dërgua Presidentit. Të tretën për t’u betuar, kreu i shtetit thirri Fiona Papajorgjin, e cila plotëson vakancën e dytë të shpallur nga Parlamenti.
DILEMA Ndërkohë mbetet e paqartë se me sa anëtarë është tashmë Gjykata Kushtetuese. Maxhoranca njeh si anëtare të Gjykatës Kushtetuese Arta
Vorpsin. Sipas maxhorancës, Vorpsi u bë anëtare e Gjykatës Kushtetuese në momentin që kreu i shtetit nuk u shpreh më datë 7 nëntor për të zgjedhur anëtarin e dytë të kësaj gjykate dhe sipas maxhorancës, hyri në fuqi sistemi zhbllokues, i cili thotë se emërohet automatikisht anëtar, kandidati që është vlerësuar me më shumë pikë nga Këshilli i Emërimeve në Drejtësi. Në listën e dytë të Presidentit, e para e renditur nga KED- i ishte Arta Vorpsi. Ndërkohë nga ana tjetër, Vorpsi nuk njihet nga Presidenti Meta, pasi ky i fundit, dy ditë pasi Parlamenti i zgjodhi të dy kandidatët në të njëjtën kohë, emëroi anëtaren e dytë, Marsida Xhaferllarin, e cila ishte e renditur e katërta. Nga ana e saj, Arta Vorpsi ditën e djeshme noterizoi betimin e saj dhe e konsideron veten anëtare të Gjykatës Kushtetuese. Tani është e paqartë se cila do të jetë në të vërtetë gjyqtare e Kushtetueses, Arta Vorpsi apo Marsida Xhaferllari.