Meta: Do flas me popullin kur të vijë momenti, siç di unë
"PD dhe LSI janë shumë më pranë Qeverisë, e lanë Presidentin të ekspozuar para një bande"
Presidenti i Republikës tha dje se do të flasë para popullit kur të vijë momenti. Gjatë një interviste në emision "Opinion" me gazetarin Blendi Fevziu, më shumë me tone kryeopozitare sesa korniza e kreut të shtetit, Meta tha se është vënë përballë një bande në Kuvend pas djegies së mandateve nga deputetët e PD- së dhe LSI- së.
Meta akuzoi Kryeministrin Rama se tenton të marrë edhe postin e Presidentit të Republikës për të firmosur disa afera, që bien ndesh me interesin kombëtar të shqiptarëve.
Zoti President, ju u shprehët vetëm pasi KED shpalli Arta Vorpsin?
Nuk ekziston zgjedhja e zonjës fjalë dhe publikimi i paligjshëm dhe mafioz i Dvoranit. Unë u shpreha pas Kuvendit, i cili nga ana e tij e shkeli Kushtetutën, kjo është punë e tij. Unë u shpreha për vakancën që më takonte mua, mes dy kandidateve që ishin në listë, zonjës Vorpsi dhe zonjë Xhaferllari, unë kam zgjedhur zonjë Xhaferllari.
Kush është anëtare e Gjykatës Kushtetuese, Arta Vorpsi apo Marsida Xhaferllari?
Kjo është një histori e përfunduar, është ajo që ka dekretin e Presidentit dhe ka bërë betimin para Kushtetutës, zonja Xhaferllari.
Po ky dekret nuk botohet në Fletoren Zyrtare?
Po kujt po i kërcet për Fletoren Zyrtare?! Jemi shtet i së drejtës, nuk jemi republikë noteriale. Dekretet e Presidentit nëse nuk botohen, hyjnë në fuqi menjëherë.
Kreu i KED e quan të pavërtetë dhe joetike gjuhën e përdorur nga ju. Keni një reagim?
Unë asistencë mjekësore nuk i afroj dot, mund të jetë në një gjendje që kërkon asistencë mjekësore. Ai paska shqetësim për etikën e Presidentit dhe nuk ka shqetësim që bëhet pjesë e një plani mafioz për t'i marrë Presidentit gjyqtarin kushtetues që duhet të propozojë. Çfarë qëndrimi mbajtën ndërkombëtarët?
Cilët ndërkombëtarë?! Ore, zotëri, unë këtë Kushtetutë e kam bërë me ndërkombëtarët. Për cilët ndërkombëtarë më flisni, për ata që nuk i kanë sytë te Kushtetuta, por te xhepi i tyre?! Ka ndërkombëtarë seriozë dhe me dinjitet si zonja Glover, që i tha gjithë botës së çfarë ishin zgjedhjet e 30 qershorit.
Maxhoranca do miratojë një rezolutë dhe shprehet se ju keni frikë nga Reforma në Drejtësi dhe doni ta bllokoni?
Unë bëj dekrete, ata bëjnë rezoluta. Ata bëjnë PPP dhe e çojnë borxhin e Shqipërisë në stratosferë, unë paskam frikë, ata mbushin të gjithë Shqipërinë me kryetarë bashkiakë me 78 emra, unë paskam frikë. Unë nuk kam frikë nga SPAK- u i Edi Ramës dhe i Ulsiut. Këto janë marrëzira.
Zoti President, kur do t'i dekretoni zgjedhjet në Shkodër dhe në Vorë?
Nuk ka nevojë më, shkoni te noteri, ose te berberi, i kanë të gjithë kompetencat.. Presidenti vepron vetëm në përputhje me Kushtetutën. Nuk kam pasur kohë të mendoj për këtë gjë, sepse kam pasur gjëra të tjera edhe më të rëndësishme. I di shumë mirë detyrimet e mia kushtetuese.
Po kur do të kemi një datë?
Nuk e di, sot kam ardhur për Gjykatën Kushtetuese.
Zoti Meta, mos ndoshta shqiptarët janë të paaftë që të kenë një Gjykatë Kushtetuese dhe një Gjykatë të Lartë?
Jo, ne kemi një grupim që synon të kapë shtetin dhe nuk dëshiron të respektojë as Kushtetutën dhe as parimet e shtetit të së drejtës, as ndarjen e pushteteve asgjë. Shiko prokuroritë si i kemi sot, shiko pushtetin vendor si i kemi sot. Por kemi një problem, kemi një President që nuk po e kapin dot. E duan ata edhe Presidentin, jo vetëm që të mos i krijojë këto shqetësime për të gjitha këto shkelje, por i duhet dikush në atë zyrë të hedhë nja dy firma, që hedhin në erë interesat kombëtare të Shqipërisë.
Për çfarë u duhet firma juaj?
Deri në 24 korrik 2022, ato firma në atë zyrë nuk hidhen.
Kaq di të them sot, nuk do t'i them të gjitha. I duan ca firma se kanë ca detyrime, ca detyrime edhe ndërkombëtarësh. Atë institucion Kushtetuta nuk e ka mbrojtur, kot edhe ashtu siç e ka mbrojtur. Nëse bien të gjitha institucionet, Presidenti është i popullit.
Presidenti zgjidhet nga Parlamenti...
Presidenti është i popullit, betohet për Kushtetutën dhe ka detyrimin ndaj qytetarëve. Ky President është i popullit, as i PS- së, as i LSI- së, as i PD- së. PD dhe LSI janë shumë më pranë qeverisë, sepse me lëvizjet që kanë bërë, që ikën nga Parlamenti, i kanë shërbyer kapjes së shtetit nga kjo maxhorancë. I kanë lënë njerëzit pa mbrojtje, i kanë nxjerrë njerëzit kot në rrugë, e kanë kthyer opozitën në OJQ, e kanë lënë edhe Presidentin e republikës, jo Ilir Metën, e kanë lënë të ekspozuar ndaj një bande ku 180 njerëz kanë dhënë dorëheqjen dhe kanë hyrë ca të tjerë, fundi i fundit të listës, që i bëjnë gjyqin Presidentit të Republikës. Nuk i ka bërë vetëm zoti Rama që i provokon ata, por e kanë bërë edhe ata që ranë pre e provokimit të tij.
Ju s'mund të jeni i vetëm trim në luftë, se kjo nuk bëhet..?
I vetëm unë nuk jam, sepse jam i popullit shqiptar dhe i gjithë shqiptarëve kudo ku janë, dhe kur të vijë momenti, do t'u flas gjithë shqiptarëve hapur siç flas unë. Një deklaratë bëra në Pogradec, vetëm fare dhe nuk mblodha as 10 mijë vetë dhe as 100 mijë vetë, dhe e transmetuan 1 mijë media botërore.
Ky është kërcënim ndaj maxhorancës, zoti President?
Kjo është deklaratë besnikërie ndaj popullit shqiptar.
Si i keni marrëdhëniet me ndërkombëtarët?
Marrëdhëniet me ndërkombëtarët, me të gjithë ndërkombëtarët me integritet, të përgjegjshëm, që nuk merren me pazare, që nuk e shohin Kushtetutën e Shqipërisë me sy dhe që nuk shikojnë në xhepat e tyre duart e Edi Ramës, i kam të shkëlqyera. Ata që e dinë që kryetar i shtetit është Engjell Agaçi, i cili nuk është njeri i keq, me ata nuk është se kam ndonjë marrëdhënie të shkëlqyer, por i takoj ndonjëherë për kortezi.
A ka nevojë vendi për zgjedhje të parakohshme?
Ka kaluar me kohë koha e zgjedhjeve të parakohshme. Sepse kjo krizë ku kemi ardhur, nuk zgjidhet veçse me zgjedhje të parakohshme.
Keni folur disa herë për shpërndarjen e Parlamentit, e rishihni si zgjidhje?
Parlamenti praktikisht është vetëshpërndarë me mënyrën sesi është kompozuar, askush nuk beson më në atë Parlament. Madje, ata deputetë të maxhorancës janë në situatë edhe më të rëndë sepse shumë prej tyre kanë eksperiencë, u ka ikur vlera sepse kanë ardhur disa deputetë të rinj, që nuk e kishin menduar se mund të shkonin në Parlament as si vizitorë dhe këtyre u ka rënë vlera fare se nuk ka nevojë njeri as për votat e tyre. Ai Parlament është vetëshpërndarë. Më vjen keq për këtë që po them, sepse kam treguar respekt për atë Parlament, e kam respektuar si institucion edhe kur shkova në atë pseudokomision të paligjshëm hetimor.
Nëse Gjykata Kushtetuese do njohë 30 qershorin, a rrezikon Shqipëria të ketë një pushtet lokal uniform për një periudhë 4- vjeçare?
Nëse Gjykata Kushtetuese do të marrë një vendim të tillë, atëherë është e qartë se ka rënë Gjykata Kushtetuese. Sepse do presin shumë vite dhe do shtohen shumë kushte për hapjen e negociatave. Të gjithë e dinë se zgjedhjet ishin të paligjshme dhe këtë e ka konfirmuar raporti i OSBE- ODIHR- it. Dekreti për 13 tetorin ishte në fuqi, por nuk u botua dhe nuk u sfidua nga asnjë Gjykatë.
A ka nevojë Shqipëria të ndryshojë sistemin zgjedhor?
Shqipëria e ka pasur të domosdoshme këtë ndryshim, populli duhet të zgjedhë deputetët dhe jo t'i emërojë kryetari i partisë. Një sistem që do zgjedhë deputetin nga populli dhe deputeti do dijë se duhet t'u shërbejë këtyre njerëzve.
Edhe Presidenti duhet zgjedhur nga populli?
Patjetër, çdo gjë që zgjidhet nga populli është më mirë.
Ka pasur komente se ju mund të dorëzoni mandatin e Presidentit dhe të vendoseni në krye të opozitës?
Kurrë, deri në 24 korrik 2022 nuk ka detyrë më të rëndësishme dhe më të shenjtë për mua sesa Presidenti i Republikës.
Në 25 korrik 2022 çfarë do bëni, do dilni në pension në moshën 53- vjeçare?
Nuk kam pasur kohë për të menduar për këtë gjë. Për mua nuk ka asnjë rëndësi se ku do jetë Ilir Meta në 25 korrik, zero. Për mua, rëndësi ka se ku do jetë Shqipëria më 25 korrik. Unë kam atë filozofi dhe përgjegjshmëri që kishte Isa Boletini: Ku është Shqipëria mirë, edhe unë jam mirë, kur Shqipëria është keq, edhe unë jam keq.
I vetëm unë nuk jam, sepse jam i popullit shqiptar dhe i gjithë shqiptarëve kudo ku janë, dhe kur të vijë momenti do t'u flas gjithë shqiptarëve hapur, siç flas unë. Një deklaratë bëra në Pogradec, vetëm fare dhe nuk mblodha as 10 mijë vetë, as 100 mijë, dhe e transmetuan 1 mijë media botërore.
Kuvendi i Shqipërisë do të miratojë sot rezolutën, e cila i kërkon Presidentit të reflektojë dhe të respektojë vetëm kompetencat që i njeh Kushtetuta. Kuvendi do të mblidhet sot në një seancë të jashtëzakonshme, për të cilën deputetët janë lajmëruar që të jenë të gjithë të pranishëm, pas dekretimit të Marsida Xhaferllarit nga ana e Presidentit Meta për në Gjykatën Kushtetuese dhe mosnjohjes së Arta Vorpsit si kandidatja e parë e listuar nga KED- i. Sipas propozuesve të rezolutës, Presidenti i Republikës me veprimet e tij ka tentuar të bllokojë funksionimin normal të Gjykatës Kushtetuese. Presidenti i Republikës, sipas projektrezolutës, mori abuzivisht kompetencat e KED- it, pasi KED është organi i vetëm që përcakton renditjen. Gjithashtu, thuhet se dekreti i Metës për Marsida Xhaferllarin është i pavlefshëm. Më tej, Kuvendi i Shqipërisë i bën thirrje Gjykatës Kushtetuese dhe organeve të tjera, që në kuadër të frymës zhbllokuese të Reformës në Drejtësi, të zbatojnë me përgjegjësi detyrat pa krijuar asnjë pengesë, për mundësimin e fillimit të detyrës së gjyqtareve kushtetuese, znj. Arta Vorpsi, znj. Elsa Toska dhe znj. Fiona Papajorgji.