KED njeh Vorpsin, Dvorani për akuzat: Të papërshtatshme
"Vlerësoj jo vetëm si të pavërteta thëniet, por si tërësisht të papërshtatshme në aspektin institucional"
Kreu i Këshillit të Emërimeve në Drejtësi, Ardian Dvorani, me anë të një njoftimi të gjatë për mediat, iu përgjigj akuzave të Presidentit Ilir Meta dhe njohu si anëtaren e dytë të Gjykatës Kushtetuese, Arta Vorpsin.
Kujtojmë se dy ditë më parë, Meta dekretoi kandidaten tjetër, Marsida Xhaferllarin për të njëjtin vend. Në reagim, kreu i KED i konsideron akuzat e Presidentit për "lojëra mafioze", si të papërshtatshme dhe të pavërteta. "Vlerësoj jo vetëm si të pavërteta thëniet, por edhe si tërësisht të papërshtatshme në aspektin institucional dhe etik, jo vetëm qëndrimin, por edhe sjelljen dhe gjuhën e përdorur nga Presidenti i Republikës, në raport me vendin, dinjitetin dhe prestigjin që i cakton Kushtetuta e Republikës së Shqipërisë", shkruhet në reagimin e Dvoranit. PËRGJIGJJA PËR
SHKELJEN Ky i fundit kthen një përgjigje edhe për pretendimin e Metës, se plotësimi i dy vakancave radhazi është në shkelje të Kushtetutës. Duke iu referuar të njëjtit nen, Dvorani thotë se interpretimi i këtij neni nuk është ai i bërë nga Presidenti. "Neni 179, pika 2 e Kushtetutës, ka për qëllim të përcaktojë institucionin kushtetues që është përgjegjës për plotësimin e një vakance të caktuar. Çdo vakancë lidhet me një emërim, ashtu si çdo vakancë ka një mandat unik, i cili i përket një momenti dhe një organi të caktuar emërimi. Kjo dispozitë parashikon radhën për vakancën që duhet të plotësojë Presidenti, vakancën që duhet të plotësojë Kuvendi dhe vakancën që duhet të plotësojë Gjykata e Lartë. Pra, kjo dispozitë nuk lidhet aspak me momentin se kur organi i Emërtesës vendos për emërimin/ zgjedhjen e gjyqtarit mes tre kandidatëve të renditur në tri vendet e para nga KED. Pra, nuk përcakton që, p. sh., në çdo rast vakanca e Presidentit duhet të plotësohet me ushtrimin e së drejtës së tij të zgjedhjes përpara se të veprojnë organet e tjera të emërtesës. Nëse vërtet ky do të ishte interpretimi dhe zbatimi i Kushtetutës, nëse vërtet organi i Emërtesës që ka vakancën e parë për të plotësuar, do të tregonte përgjegjshmëri, vullnet të mirë, integritet dhe koherencë deri në fund, përfshirë edhe respektimin e parimit të bashkëpunimit dhe luajalitetit kushtetues mes organeve të emërtesës, atëherë, do të ishin të shumta situatat, kur në mënyrë të qëllimtë apo për rrethana objektive, dot ë krijoheshin pashmangshmërisht situata bllokuese me emërimin dhe plotësimin me gjyqtarë të Gjykatës Kushtetuese. Pa qenë e nevojshme për shpjegim më të hollësishëm këtu, nuk bën përjashtim as edhe rasti konkret. Por ky nuk është qëllimi, vullneti dhe kuptimi e interpretimi i dispozitave kushtetuese të miratuara nga kushtetutëbërësi", shkruan Dvorani.
RENDITJA Kreu i KED, më tej, argumenton se organet e emërtesës nuk mund të emërojnë kandidatë që janë renditur të 4 në listë, pasi Kushtetuta dhe ndryshimet e reja ligjore të vitit 2016 i detyrojnë të zgjedhin vetëm brenda 3 të parëve. "Një nga motivet, për të cilat me ndryshimet kushtetuese të vitit 2016 u sanksionua në Kushtetutë kjo procedurë dhe ndarje kompetencash kushtetuese, ishte edhe heqja nga duart, interesat dhe humoret politike apo të çfarëdo natyre të institucioneve e mëparshme të emërtesës, pra, nga Presidenti dhe Kuvendi, të lirisë për të përzgjedhur gjyqtarët e Gjykatës Kushtetuese, sipas qasjeve të tyre individuale apo të grupimeve të ndryshme të interesit që i përbënin apo i lidhnin interesat me këto organe", shkruhet në njoftim. Në këto kushte, argumentin Dvorani, edhe vendimi i KED që rendit Arta Vorpsin të parë, në rast të kalimit të 30 ditëve, merr rëndësinë e dekretit dhe kjo kandidate është automatikisht gjyqtare e Gjykatës Kushtetuese.