Buxheti i qeverisë mahnit edhe opozitën, voton pro
Pas diskutimeve te Ligjet, miratohet me një votë kundër
Projektbuxheti i vitit 2020 ka kaluar për diskutim në komisionet parlamentare për të gjitha fushat.
Pasi iu është përgjigjur pyetjeve të anëtarëve në Komisionin e Ekonomisë, ministrja Anila Denaj ka raportuar edhe në Komisionin e Ligjeve, ndërsa në të njëjtën kohë raportuan edhe ministret Shahini, Margariti dhe Gjonaj, në komisionet respektive. Në Komisionin e Ligjeve, ministrja Denaj ka marrë mbështetje thuajse unanime nga të gjithë anëtarët. Pas sugjerimeve të deputetit socialist, Bashkim Fino, për të cilat ranë dakord edhe anëtarët e tjerë, opozita iu bashkua maxhorancës në votën pro buxhetit për vitin e ardhshëm. Në votimin në parim pas raportimit të ministres, vetëm një deputet nga opozita parlamentare votoi kundër, ndërsa të tjerët u shprehën pro. Ndërkohë, në Komisionin për Edukimin dhe Mjetet e Informimit Publik, raportimi i ministres së Arsimit, Besa Shahini, për projektbuxhetin ka ngjallur debat nga përfaqësuesit e opozitës parlamentare dhe atyre të maxhorancës. Ishte kryetarja e këtij Komisioni, Fatjona Dhimitri, e cila ngriti disa shqetësime, që sipas saj kanë qenë në vitin që po mbyllet dhe që bazuar në projektbuxhetin për vitin 2020, nuk pritet të gjejnë zgjidhje. Ajo ngriti problemin e financimit të infrastrukturës arsimore në ato bashki, që para 30 qershorit janë drejtuar nga opozita, duke ngritur aludime për diskriminim në shpërndarjen e fondeve. "Pse shpenzohen 6 milionë euro për ruajtjen e universiteteve me shoqëri private të sigurisë fizike, kur dihet që kjo është një përgjegjësi e Policisë së Shtetit? Këto fonde, fare mirë mund të shpenzoheshin për libra dhe studime shkencore. Sistemi arsimor në vitet e qeverisjes së Rilindjes është në gjendje të mjeruar më shumë se kurrë më parë. Bashkitë në të cilat para zgjedhjeve lokale qeveriste opozita, kanë qenë të cenuara në përvetësimin e fondeve publike për arsim. Mjafton të përmendim gjendjen e mjerueshme të shkollës ' Azem Hajdari' në Shkodër dhe fondet për përmirësimin e infrastrukturës së saj kanë munguar", tha Dhimitri. Edhe deputeti tjetër i opozitës, Erion Piciri, pati kritika për këtë projektbuxhet, duke vënë theksin te shuma e vogël që do të jepet për arsimin e lartë. Por kundër shifrave të këtij projektbuxheti të paraqitur nga ministrja Shahini në Komision, ka dalë edhe deputeti socialist, Fidel Ylli. Ky i fundit u shpreh i pakënaqur me financimin shumë të ulët që bëhet për sportin dhe sipas tij, kjo është një kërkesë e përsëritur e tij, që nuk ka gjetur përgjigje nga ministria. "Ne në 6 vite në pushtet kemi bërë më shumë se 30 milionë euro investime për sportin, por sërish këto futen në zërin e investimeve. Unë flas për sportin elitar, ku bëj një krahasim që nuk mundem ta pranoj. Ne kemi një buxhet 7 herë më të vogël se Kosova për sportin dhe kjo është përgjegjësi e qeverisë", tha Fidel Ylli.