Ndalohen 7 sirianë, do kalonin ilegalisht në Maqedoni
Ishin strehuar si turistë në Peshkopi, qëndronin në hotel
PESHKOPI - Dy raste të kalimit të paligjshëm të kufirit nga shtetas sirianë janë konstatuar në qytetin e Peshkopisë, por Policia lokale publikon vetëm njërin prej tyre. Përveç kësaj, Policia nuk ka ndaluar asnjë person si bashkëpunëtorë. Tri net më parë mësohet se disa shtetas të ardhur nga Siria ishin strehuar në një prej hoteleve të qytetit, ndërkohë dje janë shoqëruar 7 shtetas të tjerë sirianë, në përpjekje për largimin e tyre drejt Maqedonisë së Veriut. Zyrtarë të Drejtorisë së Policisë Dibër bënë me dije se bashkëpunimi me qytetarët parandaloi një rast të kontrabandimit të klandestinëve nga vendet e Lindjes së Mesme. “Policia e Dibrës, pas informacionit të marrë nga qytetarët për disa shtetas të huaj që po tentonin të largoheshin në drejtim të Pikës së Kalimit Kufitar Bllatë, për të kaluar kufirin në mënyrë të paligjshme, ka organizuar punën duke bërë lokalizimin dhe vendndodhjen e tyre. Policia ka bërë shoqërimin e 7 shtetasve sirianë, të cilët dyshohet se kishin hyrë ilegalisht në Shqipëri, me qëllim për të kaluar në drejtim të Maqedonisë së
Veriut dhe më pas në një nga vendet e BE- së”, sqaruan drejtues të Komisariatit të Policisë Peshkopi. Shtetasit sirianë janë shoqëruar në Qendrën e Rehabilitimit në Kukës, ndërkohë që Policia vijon hetimet për identifikimin dhe arrestimin e personit që i ka sjellë në Dibër dhe që do t’i transportonte në drejtim të kufirit me Maqedoninë, kundrejt fitimit. Sakaq, Policia heton nëse ka një rrjet të organizuar të transportimit të shtetasve të huaj. Prej nisjes së luftës në Siri, Shqipëria është kthyer në korridor të klandestinëve nga vendet e Lindjes së Mesme që synojnë emigrimin në vendet e Bashkimit Europian. Për parandalimin e fluksit, prej disa muajsh, pika kryesore hyrëse, kufiri me Greqinë, monitorohet nga Policia shqiptare në bashkëpunim me FRONTEX. Vetëm gjatë periudhës tetornëntor, në tentativë për të hyrë në Shqipëri kanë ndaluar gati 1500 emigrantë. Mes të ndaluarve gjenden sirianë, marokenë dhe irakenë, të cilët më pas strehohen në qendrën e pritjes pranë Pikës Kufitare të Kapshticës. a. l.