Kur Arta Vorpsi dhe Sadushi propozonin zgjedhjen me radhë
Procedura për të zgjedhur me radhë anëtarët e Gjykatës Kushtetuese është një propozim i dy ekspertëve të Reformës në Drejtësi, Sokol Sadushi dhe kandidates aktuale për Gjykatën Kushtetuese, Arta Vorpsi. Në procesverbalin e datës 28.09.2016 evidentohen diskutimet e bëra nga Komisioni i Posaçëm për Reformën në Sistemin e Drejtësisë, në lidhje me projektligjin "Për disa shtesa dhe ndryshime në ligjin nr. 8577, datë 10.02.2000 "Për organizimin dhe funksionimin e Gjykatës Kushtetuese të Republikës së Shqipërisë". Mbledhja drejtohej nga Fatmir Xhafaj ( Kryetar i Komisionit) dhe në të merrnin pjesë Vasilika Hysi, Pandeli Majko, Ulsi Manja, Petrit Vasili dhe Vexhi Muçmata. Ndërkohë ishin të ftuar në cilësinë e ekspertëve të lartë Sokol Sadushi dhe Arta Vorpsi. Në këtë mbledhje, Sadushi dhe Vorpsi kanë sqaruar se përse duhet të ndiqet një rend për plotësimin e Kushtetueses.
PJESË NGA DEBATI Sokol Sadushi: Më lejoni ta shpjegoj se çfarë qëllimi ka kjo dispozitë. Këtu bëhet fjalë për një kandidaturë nga Presidenti, sepse kandidatura nga Kuvendi dhe nga Gjykata e Lartë është në nenet pasuese, por mund të ndodhë në një rast eventual që mund të jenë katër kandidatura, katër vende bosh. Jemi duke folur për një moment që, nëse janë dy vende bosh, atëherë njërin e merr Presidenti, njërin Kuvendi dhe të tretin e merr Gjykata e Lartë. Ky është rast kur janë katër vende bosh. Arsyet pse janë katër vende bosh mund të jenë të ndryshme, si dorëheqja e të tjera. Nëse do të kemi katër vende bosh, atëherë do të ndodhë që në katër vende bosh një e ka Presidenti, një e ka Gjykata e Lartë dhe një e ka Kuvendi, vendi i katërt si radhë i përket Presidentit. Mund të jenë pesë vende bosh, vendi i pestë i përket Kuvendit, mund të jenë gjashtë vende bosh, vendi i gjashtë i përket Gjykatës së Lartë. Po cili ka qenë qëndrimi i anëtarëve të Komisionit të Posaçëm për Reformën në Sistemin e Drejtësisë, në lidhje me mendimin dhe sqarimet e dhëna nga Sokol Sadushi?
Fatmir Xhafaj ( kryetar i Komisionit) dhe Pandeli Majko ( relatori i projektligjit) shprehen: Kush është dakord në tërësi me të gjitha ndryshimet që iu bënë projektit bazuar në sugjerimet që u sollën nga Gjykata Kushtetuese dhe ato që u panë të arsyeshme për harmonizimin me ligjet e tjera? Kundër? Nuk ka. Abstenim? Nuk ka. Miratohet. Faleminderit! Falënderoj zotin Devil dhe ekipin e tij! Falënderoj zotin Sadushi, zonjën Vorpsi dhe përkthyesit! Një falënderim i veçantë shkon edhe për relatorin projektligjit, zotin Majko.
Pandeli Majko: I cili u ndihmua nga Sokoli dhe Arta, sepse po të mos kisha pasur ndihmën e tyre, vështirë se do të isha kaq kompetent sot.